Массимилиано Аллегри: «Бош мақсадимиз – 6-скудетто»
12 aug 2016 08:02
News
![](https://championat.asia/upload/storage/218166_original.jpg)
![](/upload/storage/218166_220.jpg)
Массимилиано Аллегри: «Бош мақсадимиз – 6-скудетто»
Кўринишидан, «бьянконерлар» ички аренадаги ютуқларни энди халқаро даражада давом эттиришни ўйламоқдалар, чоғи. Хўш, жамоа устози Массимилиано Аллегри бу борада нима дейди?
- Мана, машғулотлар секин-аста кучайтирилмоқда. Демакки, жамоада қатъий иш режими ва фаоллик яна биринчи даражали масалага айланиб улгурган. Шундайми?
- Фаоллик ва ташаббус кўрсатиш доимо муҳим саналади. Барчаси ишнинг қандай бошланишига боғлиқ. Бошқача айтганда, ҳозирги кайфият бутун мавсумга таъсир ўтказади.
- Бу йил йиғинни одатдагидан 10 кун аввал бошладинглар...
- Бу катта аҳамият касб этмайди. Ўтган йили мавсумни 7 июнь куни, ЧЛ финалидан кейин якунлагандик. Яъни футболчилар оғир мавсумдан сўнг 35 кун дам олишганди. Бу сафар таътил давомийлиги 40 кунга етди. Тўғри, ўшанда машғулотга киришганимиздан 20 кун ўтиб, суперкубок учун ўйинда майдонга тушганмиз. Муҳими, шу муддат жамоани талаб даражасида тайёрлашга кифоя қилганди. Энди эса машғулотлар учун кўпроқ вақт бор. Лекин шунинг баробарида терма жамоалар футболчиларининг ихтиёримизга кечроқ қўшилишганини унутмаслик керак.
- Хўш, «Ювентус» кетма-кет 6-марта скудетто ютишга қодирми?
- Мавсумга қўйилган биринчи даражали мақсадимиз айнан скудеттога эга чиқиш. Шунингдек, ЧЛда муносиб иштирок этишимиз шарт: имкон қадар узоқ бориб, якунда кубок соҳиби бўлишга ҳаракат қиламиз. Бироқ шошилишга ҳожат йўқ - 31 августгача ҳар кунлик иш асносида омадли мавсумга тамал тоши қўямиз.
- «Ювентус»нинг барча янги аъзолари ЧЛ ҳақида гапиришмоқда. Эҳтимол, бу турнир кубоги жамоа учун скудеттодан ҳам муҳимроқдир...
- Бир нарса аниқ: ЧЛ биз учун Италия чемпионати, кубоги ва суперкубогидек ўта аҳамиятли мусобақа. Бошқача айтганда, ўзимиз иштирок этадиган ҳар бир турнирда ғалабани тантана қилмоқчимиз. Шунинг учун ҳозирги кунда барчасини тўғри ташкил этишимиз шарт. Тўғри, омадга ҳам эҳтиёжимиз бор. Айниқса, ЧЛда бунингсиз муваффақият қозонишнинг иложи йўқ.
- Айни пайт машғулотларда тер тўкаётганлар орасида ёшлар жуда кўп. Уларда асосий таркибга кириш ва ўзларини кўрсатиш имконияти қандай?
- Бундай ёшлар учун машғулотлар жараёнининг ўзи ажойиб имконият. Ҳа, ихтиёримизда «В» серияси ва про-лигада ўйновчи ёшлар кўп. Табиийки, йиғинларда энг яхши таассурот уйғотган йигитларни асосий жамоада олиб қоламиз.
- Италия терма жамоаси Евро-2016да айнан «Юве» ҳимоячиларининг тартибли ҳаракатлари ҳисобига муносиб кўринди. Шогирдларингизнинг айниқса, Германия термасига қарши баҳсда кўрсатган жонкуярликлари билан алоҳида фахрлансангиз керак...
- Шубҳаланишга асос йўқ: «Ювентус» ҳимояси, демакки, Италия термаси орқа чизиғи жаҳон футболида энг кучлиси. Жанлуижи Буффон билан, албатта. Ҳа, ҳар қандай мураббий бундай йигитлар билан фахрланган бўларди. Ахир улар майдонда энг мушкул вазифаларни ҳам бажаришга тайёр туришади. Хусусан, Евро-2016да чинакамига жонбозлик кўрсатишди.
Ж.АБДУВАЛИХЎЖАЕВ тайёрлади
Similar news
![AMP Logo](https://championat.asia/image/logo-amp.png)
Comments