"Локомотив" - "Бунёдкор" учрашуви назоратчиси четлатилди, Коваленко эса огоҳлантирилган

Бугун Коваленкога ҳеч қандай четлатиш берилмаганлиги ва "Локомотив" - "Бунёдкор" учрашуви назоратчиси Ғайрат Каримовни ҳакамга юқори балл қўйганлиги учун 4 та ўйинга четлатиш олганлиги ҳақида хабардор бўлдик. Таъкидлаш жоизки, Каримов ўйинда Валентин Коваленкога 8.5 балл қўйган эди. Иш қайта кўриб чиқилганидан кейин ҳакамнинг бали 6.5 га туширилган. Бунга сабаб, "Бунёдкор" футболчисини иккинчи бўлимда амалга оширган жарима зарбасидан кейин, тўп "Локомотив" ҳимоячисининг қўлига текканлигидир. Шу вазият учун ҳакам "Локомотив" дарвозаси томон пенальти белгилаши лозим бўлган.

Ушбу вазиятга ойдинлик киритиш мақсадида, ПФЛ ҳакамлар департаменти бўлим бошлиғи Бобур Ҳайдаровга мурожаат қилдик.

"Локомотив" сайтидаги хабар хато. Билмадим, ким бу хабарни сайтга жойлаштирди экан. Ҳақиқатдан ҳам, назоратчига 4 та ўйинлик дисквалификация тайинланди. Шу билан бирга бош ҳакам ва назоратчининг ўйинга белгиланган пулидан 25 фоиз миқдорда ушлаб қолинди. Коваленко эса жиддий тарзда огоҳлантирилди. Ҳозирча у кейинги тур ўйинларига тайинланмай туради. Унинг иши қайта кўриб чиқилади", - дейди Бобур Ҳайдаров "СА"га берган интервьюсида.

П.С: ПФЛ регламентига кўра, учрашув бош ҳаками 1 200 000, назоратчи эса 500 000 сўм пул олади. Демак, Валентин Коваленко 300 000, Ғайрат Каримов эса 125 000 сўм жаримага тортилган.

Эслатиб ўтамиз, айни пайтда Валентин Коваленко ўсмирлар ўртасидаги Осиё чемпионатида ишлаяпти. Бугунгача у иккита ўйинни бошқаришга муваффақ бўлди.