Клуб мухлислари, "Турон"нинг ғалабали онлари ҳали олдинда эканлиги, жамоанинг ўйини, ротация ҳақида – Ислом Исмоилов иштирокидаги матбуот анжумани

"Аввало, мухлислардан узр сўраймиз. Уларнинг олдида хижолатдамиз, чунки жамоа 7 турдан буён ғалаба қозона олмаяпти. Мухлисларимиз бунга лойиқ эмас, мана бугун ҳам ноқулай об-ҳаво шароитига қарамай, келиб, бизни қўллаб-қувватлашди. Умид қиламизки, жамоанинг ғалабали онлари ҳали олдинда ва уларни хурсанд қиламиз.

Ўйинга келсак, ёмон бошламадик, биринчи бўлимда тўлиқ назоратни қўлга олдик, бир қанча вазиятларни яратдик. Лекин бу – футбол, ундан ҳар доим яхши ўйнаган жамоа ғолиб чиқмайди. Демак, ниманидир нотўғри қиляпмиз, шу боис мағлубиятга учрадик. Барча айбни ўз зиммамга оламан. Футболчилар билан гаплашиб олдик, 2 кундан кейин бизни яна бир ўйин кутмоқда. Бу нарса руҳий ҳолатимизга таъсир қилмаслиги керак. Вазиятдан чиқиб кетиш учун ҳаракат қиламиз.

Жамоамиз аъзоларига келадиган бўлсак, таркибимизда 27 та ўйинчи бор. Қайсидир пайтда рўйхатга кира олмаётган ўйинчиларни ротацияни амалга ошириб, алмаштирамиз. Бу сафар қайдномага Орифхўжа Абдухолиқов ўрнига жароҳатдан қайтган Асилбек Қаюмовни киритишга қарор қилдик", – Ислом Исмоилов