Карлуш Кейруш: "Эронлик футболчиларга мукофот пули ваъда қилинмаган"

Португалиялик мураббий ОФК расмий сайтига интервью берар экан, шундай деди: 

- "Ўйин жуда қийин ўтди. Буни катта ўйин дейиш мумкинми билмадим-у, лекин кескин жанг кечди. Биз мағлубиятсиз серия давом этгани ҳақида ўйлаётганимиз йўқ, шунчаки ўйиндан ўйинга яхши ҳаракат қилишни хоҳлаймиз. Биз Кореяга қарши ҳам ҳимояда, ҳам ҳужумда бир текис ўйин кўрсатдик". 

Эрон терма жамоаси португалиялик мураббий қўл остида сўнгги олти ярим йилда катта ўзгаришларга эришди. Терма жамоа ҳатто ФИФА рейтингида Осиё жамоалари орасида биринчи ўринга кўтарилиб олди. Эрон гарчи муддатдан аввал жаҳон чемпионатига чиққан бўлса-да, Кейруш бунинг учун футболчиларга ҳали ҳеч нима берилмаганини маълум қилди: 

- "Эронда футболчилар тарих учун курашишяпти. Улар ўз даражаларини бутун оламга танитмоқчи. Дунё эътибори биз қайд этаётган натижаларга озгина бўлса ҳам қаратилса бундан мамнун бўлардим. Эронлик футболчиларга ҳеч қанақа мукофот пули ваъда қилинмаган. Улар шусиз ҳам зўр ўйнашмоқда. Мен бундай футболчиларни кам кўрганман".