Жасур Ҳасанов: "Биз учун ортга йўл йўқ, ҳар бир учрашув финалга тенг"

"Сурхон" устидан қозонилган ишончли ғалабадан сўнг жамоанинг етакчи футболчиси, сайтимиз томонидан 11-турнинг рамзий жамоасига киритилган Жасур Ҳасановнинг фикрлари биз учун қизиқ туюлди. 

"Яхши, аммо оғир ўйин бўлди. "Сурхон" ҳам тажрибали футболчиларга эга жамоа ҳисобланади. Нима қилиб бўлса ҳам ушбу учрашувда ғалаба қозонишимиз талаб этиларди, юклатилган вазифани бажардик. "Бухоро" кучлилар сафида қолишни истаса, ҳар бир турда ғалаба қозониши керак. Олдинда кутаётган ўйинлар финалга тенг, ортга йўл йўқ.  

Ҳар бир беллашувга пухта ва ҳар томонлама тайёргарлик кўрмоқдамиз. Кўраётган бўлсангиз таркибимизда ёшлар кўп, улар ҳам шу йўсинда тажриба тўплаб боришмоқда. Тажрибали ва маҳоратли футболчиларимизнинг аксарияти жароҳат олди, кўп жамоадошларим бетоб бўлганди. Пандемия сабабли легионерларимиз ҳам кела олишмади. Мураббий Жамшид Саидов юзага келган вазият сабабли асосан ёшларга ишонч билдирмоқда. Ўйлашимча, ёш иқтидорлар ишончни оқлашмоқда. Майдонда уларга қўлимдан келганича ёрдам беришга ҳаракат қилмоқдаман. Муҳсин Муҳаммадиевни ёмон ишлади демоқчи эмасман, унинг ҳам ўзига яраша услуби бор. 

Марказлашган чемпионат биз учун қулайроқ деб ўйлайман. Ўз майдонимиз ҳали тайёр эмас, шу боис Тошкентда ўтаётган ўйинлар бизга ҳар томонлама маъқул келмоқда",- дейди Жасур Ҳасанов. 

Абдулазиз Искандаров ёзиб олди.