Футзал: Клублар ўртасидаги Осиё чемпионати қуръаси 23 майда ўтказилади

2014 йилги Осиё чемпионатида саккиз жамоа икки гуруҳга бўлинган ҳолда ғолиблик учун кураш олиб боради. Мусобақа мезбони ҳисобланган Хитойнинг «Шенжен Нанлинг Тиеланг» клуби автоматик равишда «А» гуруҳидан, 2013 йилги Осиё чемпионати ғолиби, Таиланднинг «Чонбури Бльювэйв» жамоаси эса «В» гуруҳидан ўрин олади.

Қуръа иккинчи саватидан Эроннинг «Дабири Табриз» ва Япониянинг «Нагоя Оушенс» жамоалари, тўртинчи саватидан эса Австралиянинг «Вик Вайперс» ва Кувайтнинг «Ал-Қодисия»клублари ўрин олган.

2014 йилги мусобақада Ўзбекистон шарафини амалдаги мамлакат чемпиони ҳисобланган Тошкентнинг «Локомотив» жамоаси ҳимоя қилади. Жамоа Ливаннинг «Банк оф Бейрут» жамоаси билан бирга қуръанинг учинчи саватидан жой олган.

Қуръа ташлаш маросими 23 май, жума куни Тошкент вақти билан 13:00да бошланади.

Футзал бўйича клублар ўртасидаги Осиё чемпионати баҳслари 2010 йилдан бери ўтказиб келинади. 2010 йилги мусобақада Ўзбекистон номидан «Строитель-Зарафшон», 2011-2013 йилги мусобақаларда эса «Ардус» иштирок этган бўлиб, энг юқори натижа 2012 йили Кувайтда бўлиб ўтган мусобақада қайд этилган. Ўшанда «Ардус» футболчилари мусобақа финалига етиб бориб, финалда Эроннинг «Гити Пасанд» жамоасига 1:2 ҳисобида мағлуб бўлганди.