"Эвертон" янги стадиони - "Бремли-Мур-Док"

Стадион дизайни учун таниқли муҳандис Ден Мейс масъул этиб тайинланган. Унинг ёрқин ишларига мисол сифатида "Стейплс-центр" кўп тармоқли спорт мажмуасини ва "Рома"нинг янги стадиони(2020 йилда очилади)ни келтиришимиз мумкин.

Стадион Шимолий Ливерпулда қурилади, уни "Бремли-Мур-Док" деб номлашлари кутилмоқда. Клуб вакилларининг фикрига кўра, бинонинг тузилиши замонавий тенденцияларни (пўлат ва шишадан иборат том) ўз ичига олади. Янги мажмуанинг нархи 500 миллион фунтни ташкил қилади.

Sky Sports маълумотларига кўра, янги ўйингоҳ 52 мингдан 62 минггача кишини ("Гудисон"да 40 мингдан кўпроқ эди) ўз бағрига сиғдира олади. Қурилиш 2023 ёки 2024 йилда ўз якунига етади. Шаҳарнинг бу ҳудудида стадион қурилиши иқтисодиётни жонлантиради ва Буюк Британиянинг энг қашшоқ жойларидан бири ҳисобланган Ливерпулнинг шимоли тикланишига хизмат қилади. 

CBRE халқаро консалтинг компанияси томонидан олиб борилган тадқиқотлар шуни кўрсатдики, янги стадионнинг қурилиши шаҳар иқтисодиётини 1 миллиард фунтга кўпайтиради ва 15 000 янги иш ўринларини яратади - маҳаллий оилалар бюджетига 34 миллион фунт стерлинг фойда келтиради.

Эски "Гудисон Парк"ни "Бремли-Мур-Док" қад кўтариши билан бузиб юборишади. "Эвертон" эски стадион ер майдонини сотмоқчи эмас ва бир қатор жамоат ташаббуслари учун ишлатмоқчи.

"Эвертон" бош директори Денис Барретт-Баксендейл қурилишни клуб ва шаҳар учун ақлбовар қилмас давр деб атади.

"Биринчидан, бу футбол стадиони. Бу клубга ўз мақсадларини амалга оширишга имкон беради ва мухлислар ҳам ўйиндан завқ олишлари мумкин бўлади. Шунингдек, стадион бутун шаҳар аҳли учун - ҳудуд рамзи бўлиб хизмат қилади, ривожланишга туртки беради."

Шерзод Нурматов