Эшитдик-да! Ўзбекистон футзал терма жамоаси Осиё чемпионатига чиққани учун мукофот пулларини ҳали олмаган

Championat.asia сайтига маълум бўлишича, футзал терма жамоамиз аъзолари мусобақанинг финал босқичига чиққанликлари учун ҳали ҳамон мукофот пулларини олишмаган. 

Шу йил 10-12 апрель санасида Бишкекда ўтган саралаш баҳсларида гуруҳда илк турда Непални (5:1), иккинчи турда Афғонистонни (5:1), сўнгги баҳсда Тожикистонни (5:2) таслим қилган Баҳодир Аҳмедов шогирдлари 3та ўйинда 100 фоизли натижага эришганди. 

Маълумотларга кўра, ЎФА томонидан кейинги босқичга йўлланма учун ҳар бир футзалчига 10 миллион сўмдан мукофот пулини ваъда қилган. Бироқ кейинчалик ушбу миқдор 5 миллион сўмдан берилиши айтилган. Афсуски, орадан 4 ой ўтди ҳамки пул маблағлари футзалчиларга берилмаган.

Футбол бўйича Ўзбекистон миллий ва U-23 терма жамоалари ўзлари иштирок этган турнирдаги муваффақиятли натижа учун дарҳол мукофот пулларини олишди. Аммо нима учундир футзалчиларга келганда ЎФА буни чўзиб келмоқда. Ваҳоланки, Ўзбекистон футзал терма жамоаси сўнгги Жаҳон чемпионатида гуруҳдан чиққан, Осиё "йўлбарслари" ҳисобланган Эрон билан тенгма-тенг кураш олиб борган эди.