Эксперт минбари: "Ҳужумкор ва жанговор футбол натижа келтириши мумкин" - Бахтиёр Ашурматов

Футболчилик фаолияти давомида Японияга қарши бир неча бор майдонга тушган, ўтган мавсум АГМКни Ўзбекистон кубоги ғолибига айлантирган, айни пайтда "Бухоро" клуби бош мураббийи ҳисобланган Бахтиёр Ашурматовнинг фикрлари билан қизиқдик.

"Терма жамоамиз ўйини иккита баҳсда икки хил таассурот қолдирди. Туркманистон билан бўлган ўйин жуда чиройли чиқди ва мухлислар қатори биз футбол мураббийларини ҳам хурсанд қилди. Бу учрашув биз келажакка ишонч билан қарашимиз мумкинлигини кўрсатди. Япония билан ўйин жамоамизнинг асл кучини кўрсатиб беради деб ўйлайман. Чунки бу галги рақиб Япония Туркманистонга нисбатан кучли жамоа ҳисобланади. Улар терма жамоамизга ўз ўйинини кўрсатиш имконини бермаслиги мумкин. Лекин ишонаманки, Ўзбекистон терма жамоаси ўзининг ишончли ўйини билан мухлисларни хурсанд қилади. Менимча, жамоамиз мухлисларга ёққан услубдан воз кечмасдан, ҳужумкор, комбинацион ва жанговор футбол намойиш қилса яхши натижага  эришса бўлади. Шу сабабли ҳам мазкур баҳсни мутахассис сифатида катта қизиқиш билан кутяпман ва терма жамоамизга омад тилайман", - деди Бахтиёр Ашурматов.