Даврон Файзиев: "Ўйин ҳисобини кўриб, "Қўқон-1912" осон ғалабага эришган деб ўйлаётган бўлсангиз адашасиз"

Ўйин ҳақида

- Авваламбор Рамазон ойида ва мана шундай эрта вақтда бошланган ўйинга ташриф буюрган мухлисларга миннатдорчилик билдираман. Шунингдек, айни шунақа вазиятда майдонда югурган, ўйнаган ҳар икки жамоа футболчиларига раҳмат айтаман. Ўйин ҳисобини кўриб, "Қўқон-1912" осон ғалаба қозонибди деганлар адашади. Ким ўйинни кўрган бўлса, биз бугун осон учрашув ўтказмадик. Суперлигада ва Про-лигада ҳар бир тур алоҳида қизиқарли ўйинларга бой ўтаяпти.

"Андижон SGS” жамоасининг биринчи бўлимдаги ўйини мураббий сифатида менга ёқди. Улар ўз вазиятларидан фойдалана олишганида ҳозир бошқача натижа бўлиши мумкин эди. "Андижон SGS”нинг адашмасам 4 ёки 5 нафар футболчилари Испанияда футбол мусобақасида иштирок этиб қайтишди. Кетма-кет ўйинлар барибир футболчиларда чарчоқ аломатларини кўрсатади.

- Ҳимоя чизиғи унчалик ҳам яхши кўринмаяпти. Бу холат "Локомотив" каби кучли жамоалар билан ўйинларда панд бериб қўйишидан хавотирланмайсизми?

- Бугунги ўйин билан қўшиб ҳисоблаганда бизда тўплар нисбати 12:6 кўринишига келди. 5 та турда 6 та гол ўтказиб юбориш биз учун жуда кўп. Мени хурсанд қилган жиҳат бугун ҳужум чизиғи вакилларининг гол киритиши бўлди. Ҳимояда хатоларимиз йўқ деб бўлмайди. Биз машғулотларда айни шу муаммоларни бартараф этиш йўлида ишлаяпмиз.