"Бунёдкор" собиқ бош мураббийи бўйни синган футболчини кўргани борди

У Осиё чемпионлар лигасида ғолиб чиққан "Кашима"нинг техник директори ҳисобланади. Бразилиялик мураббий Теҳронда бўлиб ўтган ОЧЛ финал жавоб ўйинини кузатди ва эртаси куни ҳамюртини кўргани меҳмонхонга йўл олди. Зико "Кашима"даги бразилиялик футболчилар Лео Сильва ва Сержиньо билан меҳмонхонага бориб, у ерда яна бир бразилиялик Леандро Падовани билан кўришди.

Маълумки, ушбу футболчи ўтган йил жамоадоши билан жуда қаттиқ тўқнашиб кетиб, бунинг оқибатида бўйнини синдириб олганди. Зико ундан ҳол-аҳвол сўрагач эсдалик учун "Кашима Антлерс" формасини совға қилди. Падовани Эрон тарихидаги энг яхши легионерлардан бири ҳисобланади. У 2012 йилдан бери Эронда ўйнаб келмоқда. Падованининг илк жамоаси "Фулад" бўлганди, шундан сўнг "Сепахон" ва "Нафт Теҳрон"да ҳам фаолият олиб борди. Ҳозирги жамоаси эса пойтахтнинг "Истиқлол" клуби.