"Бунёдкор" Симоненко олдидаги қарздорликни Ашурматовнинг трансфери орқали тўлаши мумкин

Буни "Бунёдкор" клуби бош директори Мурод Алиев тасдиқлади.

ФИФА "Бунёдкор"га бир неча кун ичида Симоненко олдидаги қарзни бутунлай узиши кераклиги ҳақида огоҳлантирган. Акс ҳолда жамоа элитадан қуйи дивизионга, яъни ПРО-лигага тушириб юборилади.

Хуш, "Бунёдкор" мазкур масалани қай тариқа ечади?

Бу саволга жавоб олиш мақсадида сайтимиз ходими Шаҳбоз Беғамов "Бунёдкор" раҳбарияти билан боғланди.

Клуб бош директори Мурод Алиевнинг бизга маълум қилишича, ФИФА талаби ва Сергей Симоненко олдидаги қарз тез орада узилиши керак. Ҳар ҳолда клуб раҳбарияти мазкур масала устида бош қотирмоқда. Мурод Алиев тез орада клуб президенти қабулига кириб Симоненко масаласини ҳал этиш ҳаракатида.

"Бунёдкор" клуби Сергей Симоненко олдидаги қарздорликни ҳимоячиси Рустам Ашурматовни сотиш орқали тўлаши мумкин. Айни пайтда "Пахтакор" клуби Рустам Ашурматовнинг хизматлари қизиқиш билдирмоқда ва ҳимоячини сотиб олиш бўйича расмий таклиф билан чиққан. Ҳозирда мазкур трансфер масаласи бўйича музокаралар давом этмоқда. Агарда музокаралар муваффақиятли якунланса, Ашурматов фаолиятини "Пахтакор" билан боғлайди. "Бунёдкор" эса трансфердан тушган маблағлар эвазига қарздорликларни ёпишга уриниб кўради.

"Бунёдкор" бош директори Мурод Алиев айни пайтда мазкур масала ва муаммо устида бош қотирмоқда ҳамда ўз анъаналарига эга жамоани элитада сақлаб қолиш учун клуб охиригача курашишини таъкидлаб ўтди.

Эслатиб ўтамиз, "Бунёдкор"да ўйнаб кетган Сергей Симоненко олдидаги қарздорлик туфайли яқинда ЎФА ФИФА талаби бўйича "қалдирғочлар"дан 6 очкони олиб ташлаганди.