Бугун футбол. "Локомотив" - "Бунёдкор"

Мухлислар Тошкентда пойтахт дербиси гувоҳи бўлишади. "Локомотив" ўз майдонида "Бунёдкор"ни қабул қилади. Турнир жадвалида "Локомотив" 22 очко тўплаб 9-ўринда бормоқда. "Бунёдкор" ҳисобида 29 очко бўлиб, бу жамоа 6-ўринни эгаллаб турибди. 

"Локомотив"да тўплар нисбати 21-33. "Бунёдкор"да 26-23. "Локо" шу пайтгача 7та, "Бунёдкор" эса 8та беллашувда зафар қучган. 

"Темирйўлчилар" иккинчи даврани кетма-кет 3 ғалаба билан бошлашди. Андрей Микляев шогирдлари дастлаб "Андижон", сўнгра "Навбаҳор" билан "Бухоро"ни мағлуб этишди. Охирги 3та турни сафарда ўтказган "Локомотив" уч хил натижа қайд этди: "Бухоро" билан ўйинда ғалаба, Бекободда "Металлург"га қарши дуранг ва Жиззахда "Сўғдиёна"дан мағлубият.

"Бунёдкор" иккинчи давра бошланганидан бери ҳозирча 4та учрашув ўтказди. Бунда иккита ғалаба ва иккита мағлубият қайд этилди. "Қалдирғочлар" "Сурхон" ва "Машъал"дан устун келиб, аввалги икки турда АГМК ва "Қўқон-1912"га имкониятни бой беришди. "Бунёдкор"нинг 18-тур "Пахтакор" билан ўйини ноябрь ойига қолдирилган. 

Факт: 2015 йилдан бери "Локомотив" ўз майдонида "Бунёдкор"га қарши олти марта баҳс олиб бориб, шундан 4тасида ғалаба қозонган ва икки бор дуранг ўйнаган. Тўплар нисбати 11-4. 

2019. "Локомотив" - "Бунёдкор" 0:0

2018. 2-босқич. "Локомотив" - "Бунёдкор" 2:1

2018. 1-босқич. "Локомотив" - "Бунёдкор" 3:1

2017. "Локомотив" - "Бунёдкор" 3:2

2016. "Локомотив" - "Бунёдкор" 0:0

2015. "Локомотив" - "Бунёдкор" 3:0