“Бир футболчи тарихи”. Пенальтини антиқа усулда тепадиган Бруну Фернандеш ҳақида

Жилла қурса, унинг қандай ўйналишини биласиз, кўргансиз, эшитгансиз. Футбол ўйинида пеналти жуда ҳам оддий ҳамда ажойиб стандарт вазият. Лекин, аслида, у ҳам анча мураккаб. Ташқаридан кўринганда оддий, уни тепаётган ҳамда дарвозани қўриқлаётган дарвозабон учун эса мураккаб. Сиз пеналтини қандай тепасиз? Кучли зарб биланми, ёки “Паненка услуби”дами? Ҳар доим бир хил – ўз услуби билан пеналтй тепа оладиган футболчилар кам. Бир вақтлар Криштиану Роналду тепадиган услубини футбол қоидалари инкор қилди. Бугун эса бу тур бошқача оммалашган. Оммалашишига сабабчи эса “Манчестер Юнайтед”нинг португалиялик юлдузи Бруну Фернандешдир. Агар сиз унинг ижросини билмасангиз, дастлаб қуйидаги видеони кўриб чиқинг.

Бугунги қаҳрамонимиз ҳам нафақат пеналти, балки футболда ҳам ўз услуби ва ўрнига эга бўлган Бруну Фернандеш.

Бруну Фернандеш – ким ўзи у?

Бруну Мигел Борхес Фернандеш – 1994 йилнинг 8 сентябрь куни Португалиянинг Порту шаҳридаги Мая туманида туғилди. Футболчилик сир-асрорларини айнан ўзи туғилган жойдаги маҳаллий “Инфеста”, “Боависта” ҳамда “Паштелеира” жамоаларида ўрганди, фаолиятини бошлаб юборди. 2012 йилда эса Италияга кўчиб ўтди ва у ердаги “Новара” жамоаси футболчисига айланди. 

Клублардаги фаолияти ҳақида

Футболдаги дебютини эса айнан 2012 йилнинг 3 ноябрь куни Италия Б Серияси доирасида “Cитаделла”га қарши ўйинда ўтказди. Дебют голи ҳам уни узоқ куттирмади: 2013 йилнинг 22 февраль куни “Новара” таркибидаги илк голини урди. 

Мавсум якунлангач эса Бруну “Удинезе” жамоаси футболчисига айланди. Дебют ўйинини 2012 йил 3 ноябрь куни ўтказган Фернандеш А Сериядаги илк ўйинини ҳам 3 ноябрь куни ўтказди, фақат орадан бир йил ўтган эди. “Интер”га қарши баҳсда захирадан ўйинга қўшилган эди. “Удинезе”даги илк голи февраль ойида бўлди, ҳудди аввалги жамоасида бўлгани каби. 

3 йиллик фаолиятдан сўнг 2016 йилнинг 16 август куни “Сампдория” футболчисига айланган Бруну дебютини “Аталанта”га қарши ўтказди. Сентябрь ойида эса жамоадаги илк голини уришга муваффақ бўлди. 

Орадан 1 йил ўтар-ўтмас Фернандеш ўз юртига қайтадиган бўлди. Бу сафар анчагина кучли жамоа уни ўзига чорлаётган эди. 2017 йилнинг 27 июнь куни “Спортинг” жамоасига бориб қўшилди. 6 август куни “Авес”га қарши ўйин билан Португалия Премьер лигасидаги илк ўйинини ўтказган бўлса, 19 августда “Витория Гимараес”га қарши ўйин дубл қайд этишга муваффақ бўлди. Мавсум охирида Фернандеш Португалия чемпионатида “йилнинг энг яхши футболчиси” бўлди. 2018 йил 10 июль куни эса жамоа билан 5 йиллик шартномага имзо чекди. 

“Спортинг” сафида бир неча рекордларни 2018/19 йилги мавсумда амалга оширди. “Портимоненсе”га қарши баҳсда мавсумда 23 голини киритди ҳамда бу борада “Спортинг” сафида ярим ҳимоячилар орасида бир мавсумда энг кўп гол урган Антонио Оливейранинг рекордини ортда қолдирди. Қайд этиш керакки, ушбу реcорд 1982 йилги мавсумда ўрнатилган эди. 2019 йилнинг 5 май куни эса “Белененсс”га қарши баҳсда хет-трик қайд этгач бир мавсумда Португалия чемпионатида ярим ҳимоячилар орасида энг кўп гол урган футболчига айланди. 

Бруну Фернандеш Италия ҳамда Португалия чемпионати ва у ердаги футболчилар ҳақида гапирганида: “Португалияда ҳаммаси ўйинчилар иқтидорига боғлиқ. Ўйинчилар ривожланиш йўлида академияларда қаттиқ ишлашлари шарт. Айнан ўзини кўрсатган футболчи хорижнинг номдор жамоаларига йўл олади. Португалияда ҳар бир истиқболли ўйинчидан шундай улкан қадам ташлашни кутишади. Италияга келсак, шахсан мен у ерда кўп нарсаларни ўзлаштирдим. А Cерияда мураббийлар асосий эътиборни тактикага қаратишади. Ўйлашимча, Италия элит дивизионида малака оширган футболчи ҳар қандай чемпионатда бемалол ўйнаб кетади” – деган эди.

Фернандешнининг ўйинини кўп футбол ихлосмандлари ҳамюрти Руи Коштага ўхшатишади. Ўзидан бу ҳақида сўрашганида: “Кошта билан ўртамизда улкан тафовут бор. Унинг самарали фаолияти ҳавас уйғотиши турган гап. Табиийки, янада самаралироқ ўйнашни хоҳлайман. Тушунаман, бу осон эмас. Мақсадим - кун сайин камолотга яқинлашиш. Хуллас, мухлисларни чиройли ўйин билан қувонтирсам, бас” – деган жавобни берган эди. 

2020 йилнинг январь ойи. Қишки трансферлар вақти унга жуда ҳам кўп таклифлар бор эди. Футболчи эса ўз омадини Англияда синаб кўрмоқчи бўлди ҳамда “Манчестер Юнайтед” сафига бориб қўшилди. Трансфер нархи эса 55 миллион еврони ташкил қилган. Турли бонуслар билан қўшиб ҳисоблаганда 80 миллион еврони ташкил этарди. Футболчи жамоа сафига қўшилишдан аввал Криштиану Роналду билан маслаҳатлашган. Ўзи бу ҳақида шундай дейди: “МЮга ўтиш вариантини бирга муҳокама қилдик. У фақат ижобий фикр билдирди. Яна ўз орзуларини амалга оширишни айнан МЮда бошлаганини алоҳида таъкидлади. Ўйлайманки, Роналду шу клубни танлаганимдан мамнун. Шунингдек, у Оле-Гуннар мен ҳақимда жуда илиқ фикрлар билдирганини айтди. Биз Португалия терма жамоасида ёнма-ён тўп сурамиз. Демак, Криш мени яхши билади. Ўз навбатида, уни чинакам инсон сифатида ҳурмат қиламан ва изидан боришни истайман”. Шунингдек, Оле Гуннар Сулшер бу трансфердан аввал Патрис Эвра билан маслаҳатлашиб кўрган ва энг қизиғи, Эвра ҳам бу борада Криштиануга мурожаат қилган. “Жамоа Бруну Фернандеш билан шартнома имзоламоқчи бўлганида, Оле менга хат ёзди. Мен Роналдудан маслаҳат сўрадим. У Брунонинг ажойиб йигитлиги, жуда профессионаллигини айтди. Ўз навбатида мен ҳам Олега Криштиану билан гаплашганимни ва ҳаракатни бошлаш мумкинлигини айтдим. Натижада Фернандеш жамоага катта таъсир кўрсатди. Менимча, МЮ усиз Чемпионлар Лигасига чиқолмасди” – деб эслайди франциялик футболчи. 

Фернандеш манчестерликлар билан 5 ярим йиллик шартномага имзо чекди. Дебют учрашувини эса 1 февраль куни “Вулверхэмптон”га қарши ўтказди. Дастлабки голини эса 23 февраль куни “Уотфорд”га қарши ўйинда урди. Жамоага қўшилгандан сўнг берган интервюсида: “Айнан МЮ сафига қўшилганимдан бағоят бахтиёрман. Бу клуб аъзоси бўлиш - улкан шараф. Айтиш мумкинки, энг катта орзуларимдан бири амалга ошди” – дея таъкидлаган эди.

Терма жамоадаги фаолияти

Бруну Португалиянинг турли ёш жамоаларида ўйнади. U-21 терма жамоаси билан 2014 йил Тулондаги турнирда иштирок этган бўлса, 2016 йили Рио-де-Жанейродаги Олимпия ўйинларида ҳам қатнашди. 2017 йилги мавсумда U-21 сафида Полшада бўлиб ўтган ёшлар ўртасидаги Европа чемпионатида ҳам иштирок этди. Ўша турнирда Сербияга қарши баҳсда эса тўп киритишга муваффақ бўлди. Айнан ўша йилнинг 10 ноябрь куни Португалиянинг асосий терма жамоаси сафида Саудия Арабистонига қарши ўртоқлик баҳсдиа дебют қилди. 2018 йилнинг 7 июнь куни эса Жазоир термасига қарши ўйинда терма жамоадаги илк голини урди. Россиядаги Жаҳон чемпионатида иштирок этди ҳамда гуруҳ босқичидаги Испания ва Марокаш термаларига қарши ўйинларда иштирок этди. 

Шахсий ҳаёти 

2020 йил Бруну учун омадли келди деса бўлаверади. “Манчестер Юнайтед”га ўтганидан ташқари бу йили қаҳрамонимиз иккинчи бор ота бўлди. 6 сентябрь куни Фернандешлар оиласида “жажжи меҳмон” ташриф буюрди. 

Ўзининг Твиттердаги саҳифасига фарзанди билан тушган суратни жойлаб остига қуйидагича изоҳ ёзди: “Балки мен мукаммал ота эмасдирман. Ҳа албатта, мен ҳамма нарсани ҳам тўғри қилавермайман. Лекин фарзандим табассуми учун ҳар куни яхшироқ ота ва дўст бўлишга ҳаракат қиламан”.

Яқинда ҳам ўз Instagram саҳифасига оиласи билан тушган суратни жойлади. Унда келаётган янги йил байрамига тайёргарликни кўриш мумкин.

Бруно эмас, Бруну Фернандеш

Ўзининг исми ҳақида сўрашганида футболчи қуйидагича жавоб берган эди: “Талаффуз муҳим эмас. Гол урсам ёки ассистентлик қилсам, исмим стадионда янграса, бас. Менга кўпинча Бруну, деб мурожаат этишади. Яна иккинчи бирикмадан ҳам фойдаланишлари мумкин - Фернандеш. Тўғри, португал тилидан хабари йўқ кишилар исмимни тўғри айтишга қийналишади. Дейлик, Италияда ҳеч ким тўғри талаффуз қилолмасди. Шундай экан, оддийроқ бирикма – “Бруну”ни қўллашлари тўғрироқ, менимча”.

Футболчилар ҳақида ёзганимизда уларнинг қайсидир бир жиҳатини ажратиб кўрсатамиз. Брунуда ҳам шундай. Оддий мисол, унинг пеналти тепиши. Агар бир футболчи бошқалардан бирор ҳислати билан ажралиб турмаса, балки у ўзининг ҳозирги даражасига чиқа олмасмиди?! Энг муҳими эса футболда иқтидорлар чиқиши тўхтаб қолмаса бўлди. Бугун ҳам улардан бири билан танишдингиз. Саломат бўлинг!

Оғабек Самисов тайёрлади