Баҳром Ҳакимов: “Кенжаев қобилиятли йигит эди. Унга ёрдам беришга тайёрмиз”

Футболчи ва ҳайрия ҳақида тўлиқ ёзиб ўтдик. Биз эса Кенжаевни олий лигада кашф қилган мураббий Баҳром Ҳакимов билан суҳбатлашиб, шогирди ҳақида сўрадик.

- Баҳром ака, футболчиларимиз ташаббуси билан собиқ шогирдингиз Камолиддин Кенжаевнинг соғлиги учун хайрия тадбири ўтказиш режалаштирилган. Бу борада хабарингиз бўлса керак?
- Рости бу ҳақда энди сиздан эшитдим. Агар шундай бўлса, албатта жуда яхши ўйланган иш. Унда имкони бўлса иштирок этишга тайёрман.

- 29 ноябрь куни Тошкентда “СА”нинг 4 ёшини нишонланади. Шу аснода ҳайрия тадбири ҳам ташкил этилиб, ундан тушган пуллар Кенжаев учун сарф этиладиган бўлди.
 - Яхши фикр. Мен ҳам қўлдан келганича бунинг учун ёрдам беришга тайёрман. Шогирдларим билан гаплашганимда, уларга ҳам бу ҳақда айтаман.

- Келинг ушбу шогирдингиз ҳақида гаплашамиз. Кенжаевни олий лигада сиз кашф этгансиз. Бу қандай жараён бўлган?
- Камолиддинни 2000 йили асосий таркибга жалб этганман. Унгача футболчи ўринбосарлар таркибида ўйнарди. У билан бирга Ботир Қораев, Жасур Ҳамроев шу учаласини бир нечта учрашувларда уни диққат билан кузатдим, ҳаракатлари чакки эмас. Кейин аста-секин уларни асосий таркиб футболчилари билан машғулотларга қўшдим ва захирадан тушириб ўйнатдик. Ёш бўлишига қарамай, Кенжаев анча тиришқоқ, мехнатсевар йигит эди. Машғулотларда ишлашдан қочмасди. Инсонийлик жиҳатдан ҳам бошқаларга намуна бўладиган эди.

- Ўша пайтда “Насаф”нинг ҳимоя чизиғида Асрор Алиқулов, Бахтиёр Намозов сингари тажрибали ўйинчилар бўлишига қарамай, эндигина 20 ёшга тўлган футболчига ишонч билдиришдан ҳайиқмаганмидингиз?
- Тўғри, айтасиз таркибда маҳоратли ҳимоячилар кўп эди. Лекин Кенжаев ҳам улардан қолишмасди. Нормативни улар билан баробар топширарди. Шундай экан қандай қилиб уни асосий таркибга киритмаслигим мумкин.

- Кенжаев билан гаплашиб турасизми? Охирги марта қачон гаплашгандинглар?
- Ҳа, Камолиддин билан тез-тез телефон орқали бўлсада гаплашиб турамиз. Охирги марта 1 октябрь, устоз ва мураббийлар кунида гаплашгандик. Агарда Қаршига борсам, албатта имкони топиб Кенжаевнинг хонадонига ҳам кириб ўтишга уринаман. Оиласини яхши биламан.


Исломбек Рустамбеков суҳбатлашди.


Буни ҳамма ўқиши шарт! Камолиддин Кенжаевга ёрдам берамиз, акцияда иштирок этинг!