Баҳодир Мирзаев: "Маркетингга катта урғу берсак, стадионларимиз "Ал Иттиҳод" билан ўйинда бўлганидек тўла бошлайди"

Семинар доирасида ўзбек мутахассислари Туркиянинг гранд клубларига ташриф буюриб, “Фенербаҳче” ва “Галатасарой”нинг иш услуби билан тўлиқ танишиш имкониятига эга бўлишди. Ҳар икки клубнинг спорт директорлари, тижорий директор ва бош скаутлари клубларимиз вакиллари билан ўз тажрибаларини ўртоқлашди.

Мазкур семинарда иштирок этган ОКМК футбол клуби бош директори Баҳодир Мирзаев семинар доирасида янги билимлар олгани ҳақидаги фикрларини билдирди:

- Семинар чиндан ҳар томонлама фойдали бўлди. Туркия футбол федерацияси, “Фенербаҳче” ва “Галатасарой”га ташрифлар, ушбу клубларнинг иш-фаолияти ва тузилмаси билан яқиндан танишиш, қолаверса, “Галатасарой” – “Адана Демирспор” ва “Бешиктош” – “Фенербаҳче” учрашувларини бевосита кузатиш, учрашувга жамоаларнинг қандай ҳозирлик кўриши билан танишиш барчамизда катта таассурот қолдирди.

Менга энг маъқул келган жиҳат – ушбу турк грандларида фаолият юритаётган етакчи мутахассислар бизга ўз клубининг йиллар давомида қандай қилиб ушбу муваффақиятларга эришгани ва 10 йиллар давомида босиб ўтилган йўлда учраган айрим камчиликларни биз ҳам қайтармаслигимиз бўйича ўз тавсия ҳамда маслаҳатларини улашишгани бўлди.

Мисол учун, турк грандлари тижорий йўналишда қандай иш олиб бориши, клубнинг ўйинга тайёргарлик доирасида мухлислар учун яратадиган шарт-шароит ва қулайликлари, клуб расмий дўконларининг кенг тармоғи мавжудлиги, ўйин куни стадионнинг бир нечта нуқтасида клуб аттрибутикалари савдоси олиб борилишини ўрганиш анча фойдали бўлди. Мухлислар севимли жамоаси ўйинига оиласи ва фарзандлари билан 3-4 соат аввалдан келиб, клуб музейини томоша қилиши, стадионда бемалол овқатланиш имконияти ҳам мавжудлиги ва оила аъзолари билан мириқиб ҳордиқ чиқариш имкони яратилгани тақсинга сазовор.

Турк клубларида маркетинг ва футбол узвий ҳамоҳангликда фаолият юритаётганига гувоҳ бўлдик. Шу каби жиҳатларни ўрганиб, ўзимизда ҳам тўлиқ татбиқ этиш вақти келди.
Биз ҳам маркетингга ҳозирданоқ катта урғу берсак, секин-аста бизда ҳам стадионлар худди “Ал Иттиҳод” билан ўйинда бўлганидек тўла бошлайди. ОКМК футбол клуби ортда қолган мавсумда клуб дўкони шахобчасини ишга туширди. Янги мавсумда биз ҳам савдо шахобчаларимиз сонини оширамиз ва мухлисларимиз учун янада кўпроқ ва сифатли маҳсулотлар тақдим эта бошлаймиз. Мухлислар оилалари билан стадионга кела олиши учун шароитларни, кўнгилочар дастурларни тайёрлаймиз. Насиб этса, бизда ҳам яқин йилларда бутун стадион худди турк грандлари каби ўз севимли жамоамиз мадҳияларини жўр бўлиб куйлай бошлайди, - деди Баҳодир Мирзаев.