Амиржон Сафаров – «Динамо»нинг апрель ойидаги энг яхши футболчиси!

Сўров якунларидан олдин қайд этиш жоиз, апрель ойида «Динамо» Олий Лига доирасида 4 та ўйинда иштирок этди:

5-тур (7 апрель): «Қўқон-1912» - «Динамо» - 2:1

6-тур (15 апрель): «Динамо» - «Бухоро» - 3:1

7-тур (20 апрель): «Бунёдкор» - «Динамо» - 1:1

8-тур (29 апрель): «Динамо» - «Сўғдиёна» - 2:2

Ушбу баҳсларда бир мағлубият, бир ғалаба, икки дурангга эришган «Динамо» 8-турдан кейин 14 очко билан 3-ўринни эгаллаб турибди.

Эътиборлиси, ушбу тўрт баҳсда асосан захирадан майдонга тушган бўлишига қарамай, жамоа ҳужумчиси Амиржон Сафаров 3 та гол («Бухоро» ва «Сўғдиёна» билан ўйинда) ва 1 та голли пас («Қўқон-1912» билан ўйинда) амалга ошириб, якунда мухлислар овозларига кўра, «Динамо» жамоасининг апрель ойидаги энг яхши футболчиси деб топилди. Унга 106 та овоз, яъни умумий овозларнинг 32.5 % фоизи берилган.

Иккинчи ўриндан эса Жавоҳир Қаҳрамонов жой олди. Жамоанинг иқтидорли яримҳимоячиси «Бухоро» ва «Бунёдкор»га қарши баҳсда биттадан гол уриб, битта голга ҳаммуаллифлик ҳам қилди. Унга мухлисларнинг 30.4%, яъни 99 та овоз берилган.

Бу борада учинчи ўриндан жамоанинг ягона легионери, Раду Рогак жой олган. 22 ёшли молдовалик ҳимоячига 43 та овоз (13.2%) берилган.

Шунингдек, Акмал Бозоров 35 (10.7%), Жасур Азимов 12 (3.7%), Миркомил Локаев 10 (3.1%), Абдужамол Исроилов 8 (2.5%), Михаил Наумов 7 (2.1%), Ориф Мамажонов 6 (1.8%)ларга ҳам овозлар берилган. Cўровномада жами 326 овоз иштирок этган.

Эслатиб ўтамиз, март ойи якунларига биноан, жамоа сардори Акмал Бозоров «Динамо»нинг энг яхши футболчиси деб топилганди.