"Ал Ваҳда" бош мураббийи: "Шармандали мағлубиятни қабул қилиб олдик"

Учрашувни 0:5 ҳисобидаги мағлубият билан тугатдик. Буни шармандали мағлубият дея оламан. Биринчи бўлим тенг бўлди, аммо бир нечта кутилмаган голлар ўтказиб юбордик. Умид қиламанки, кейинги ўйинларда бу хатоларни такрорламаймиз ва ижобий натижага эришамиз.  

- Бугун иккинчи дарвозабонни тушурдингиз. ОЧЛ сизлар учун муҳим мусобақа эмасми? 

- Ҳар бир мусобақа биз учун муҳим. Ҳали олдинда 5та ўйин бор. Фақат бугунги ўйин билан хулоса қилманглар. Бу ерга етакчи ўйинчилар кела олишмагани ҳам таъсир қилди. Менда биринчи ёки иккинчи дарвозабон деган тушунча йўқ. Шунчаки бугун омадимиз келмади. Иккала дарвозабон ҳам мен учун бир хил.

- Кейинги ўйинга қадар оз вақт бор...

- Жамоамиз 15та ўйинда ютқазмади, ўша ўйинларда кам зарба бергандик. Футболчиларимни танқид қилмоқчи эмасман. "Локомотив"ни ғалаба билан табриклайман.  

- "Ал Ваҳда" футболчиларида жисмоний ҳолати паст эдими?

- Бу фикрга қўшила олмайман. Биринчи таймда тенг ўйнадик. Шунчаки кутилмаган голлар ўтказдик. Хатто ўз дарвозамизга гол ҳам уриб қўйдик. 

- 10, 22 ва 70 рақамдаги ўйинчилар бизнингча яхши ўйнашди. Сизнинг фикрингиз қандай?

- Балки улар бошқалардан кўра яхшироқ ўйнашгандир. Аммо 0:5 ҳисобида ютқазган ўйинда қайсидир футболчини яхши ўйнади деб айтиш қийин. Кейинги учрашувда барча ўйинчиларимиз яхши ўйнашларига умид қиламан.