Африкада йилнинг энг яхши футболчиси бўлишга даъвогарлар эълон қилинди

Африка футбол конфедерацияси расмий сайтида йилнинг энг яхши африкалик футболчиси номига даъвогарлар келтириб ўтилди.

Даъвогарлар рўйхатидан ушбу совриннинг амалдаги ғолиби Садио Мане ("Бавария", Сенегал), Рияд Марез ("Манчестер Сити", Жазоир), Муҳаммад Салоҳ ("Ливерпуль", Миср), Карл Токо-Экамби ("Лион", Камерун), Венсан Абубакар ("Ал-Насср", Камерун), Себастян Аллер ("Боруссия Д", Кот-д'Ивуар), Наби Кейта ("Ливерпуль", Гвинея), Ашраф Ҳакими (ПСЖ, Марокаш), Эдуард Менди ("Челси", Сенегал) ва Калиду Кулибали ("Наполи", Сенегал) жой олди.

Йилнинг энг яхши терма жамоаси номи учун Буркина-Фасо, Камерун, Миср, Марокаш ва Сенегал кураш олиб боради. Ғолиблар конфедерация техник қўмитаси, журналистлар, терма жамоалар бош мураббийлари ва сардорларининг овоз бериш йўли билан аниқланади.

"CAF Awards 2022" тақдирлаш маросими 21 июль куни Марокашнинг Рабат шаҳрида бўлиб ўтади.