Аброр Хусинов: “Арал Самали"га қарши ўйинлар биз учун дербидек гап”

- Бу ўйин биз учун дерби ҳисобланади, - дея гап бошлади Хусинов. Турнир жадвалида ким қайси ўринда туришидан қатъий назар, ушбу беллашувда ғалаба қозониш муҳим аҳамиятга эга ҳисобланади. Меҳмонда ўйнаётган бўлсак-да, ғалаба қозониш учун майдонга чиқдик. Асосийси, бу ўйинда ғалаба қозондик.

- Сизнингча, жамоа ўз олдига қўйган мақсадларига эриша олдими?
- Бу мавсум ҳар бир ўйинда ғалаба қозонган ҳолда турнир жадвалида юқори ўринларнинг бирини эгаллаш вазифаси қўйилганди. Дейлик, ўз вақтида керагидан ортиқ очколарни ҳам бой бердик. Баъзида ўз даражамизда ўйнай олмадик.

- “Хоразм”да қоласизми ёки келгуси йилда фаолиятингизни бошқа жамоада давом эттирасизми?
- Ҳозирча бу ҳақида ўйлашган вақт бор. Чунки олдинда бизни бир нечта ўйинлар кутмоқда. Барчасига мавсум якунида жавоб олиш мумкин.

- Бу йилги Про-лига ўйинлари сизда қандай таассурот қолдирмоқда?
- Жуда яхши. Про-лиганинг жорий мавсумида иштирок этаётган ҳар бир жамоа кучайган. Бирорта баҳс осон кечгани йўқ. Бир очко олиш учун ҳам катта қийинчиликларга дуч келмоқдамиз. Қисқаси, чемпионат савия ошган ва бу ўйинларни қизиқарли ва муросасиз кечишига замин яратмоқда.

- Сизда қайси жамоалар яхши таассурот қолдирди?
- Деярли ҳамма жамоалар яхши таассурот қолдирди. “Нефтчи” ҳақли равишда чемпионликка эришди. Чунки улар мавсумни бир текис ўтказди. Шунингдек, “Олимпик” клуби ҳам ёш бўлса-да, чакки эмас.