Аббос Махсталиев: "Терма жамоанинг тез-тез йиғин ўтказиши жуда зарур ва фойдали"

Ушбу йиғинни икки ғалаба ва бир дуранг билан якунлаган терма жамоамиз аъзоси Аббос Махсталиев "CА" сайтига ўз фикрларини билдириб ўтди.

"Ҳар бир ёш тоифасида терма жамоаларнинг тез-тез йиғин ўтказиб туриши бу жуда ҳам зарур ва фойдалидир. Мисол учун, биз клубларда бўлсак фақатгина яқин сафдошимиз билан ўйин услубимизни бир фикрда англаб олишимиз мумкин. Терма жамоа бўлгандан сўнг барча клубдан, ҳар хил ўйин услубига эга бўлган футболчилар ташриф буюради. Ҳар бир футболчи индивидуал аъло натижа кўрсатиши мумкин лекин терма жамоа учун энг муҳими бирликдир. Олдимизда жиддий мусобақа турибди. Осиё чемпионатида жамоамиз шарафини муносиб ҳимоя қилмоқчимиз.

Бўлиб ўтган йиғин борасида гапирадиган бўлсам кўнгилдагидек ўтди. Кўплаб футболчилар билан бирга ўйнаганим учун менга жуда қийин бўлди дея олмайман. Албанияни осон мағлуб этмадик. Биринчи ўйинда кўплаб хатолар ҳам бўлди. Баҳрайн билан ўйинда эса бизга омад келмади. Алишер Шоғуломов, Қувондиқ Рўзиевда яхши имкониятлар юзага келди. Баҳрайн иккинчи бўлимда асосан вақтни ўтиши учун ўйнади. Бизга назорат баҳсида фақатгина ўйин керак эди. Натижани эса Осиё чемпионатида кўрсатмоқчимиз", - дейди Аббос Махсталиев.