Бундеслига, 4-тур. ПРЕВЬЮ

Бундеслиганинг 4-туридан ўрин олган илк беллашув "Фрайбург" - "Герта" ўртасида кечади. Бу жамоалар айни пайтда турнир жадвалида ёнма-ён кетишмоқда. Тур ўйинлари "қўшнилар" баҳси билан бошланиши бу ўйинга бўлган қизиқишни янада ошириб юборади. Ўтказилган уч ўйиннинг фақатгина биттасида дуранг қайд этган "Фрайбург" ва "Герта" бу сафар уч очко илинжида бир-бирлари билан кураш олиб боришади. "Фрайбург" ўйинни ўз уйида ўтказиши уларга бироз ташаббусни тақдим этиши мумкин. Аммо "Герта" меҳмонда гол уришни "севади"ган жамоа ҳисобланади. Лекин шу билан бирга берлинликлар ўз дарвозалари олдига яқинлашган рақибларига яхши "меҳмондўстлик" қилишни ҳам билишади. Бир сўз билан айтганда, тенг кучли жамоаларнинг бу баҳси ҳар томонлама қизиқарли кечишини тахмин қилса бўлади. Қайси жамоа янги мавсумдаги илк ғалабасини нишонлайди? Ёки жамоалар яна бир очкодан бўлиб олишадими? Бу саволларга кечроқ бўладиган ўйин жавоб топиб беради.
 


Эртага эса бундеслиганинг 4-туридан ўрин олган яна олтита ўйини бўлиб ўтади.

Мавсумни кўтаринки руҳда бошлай олмаган "Шальке" жамоаси бу сафар ўз майдонида Франкфуртнинг "Айнтрахт" жамоасини қабул қилади. Дастлабки уч турдан кейин ҳали бирор марта ғалаба қозона олмаган "Шальке" клуби, чоршанба куни Европа чемпионлар лигаси доирасидаги баҳсда "Челси"дан очко тортиб олишни уддалади. Лондонда қайд этилган бу натижадан сўнг, гельзеркирхенликларни ўз кучларига бўлган ишончлари яна қайтди. Эндиликда "Шальке" ўз мухлислари қаршисида бўладиган учрашувда "Айнтрахт Ф" устидан ғалаба қозониши кутилмоқда. Лекин бунга "Айнтрахт Ф" жамоаси рози бўладими? Турнир жадвалида "Шальке"дан тепароқда турган клуб меҳмондан камида дуранг натижаси билан қайтишни режалаштирган. Бу баҳсда кимнинг режаси амалга ошишини эса вақт кўрсатади.



Мюнхеннинг "Бавария" жамоасига "қўшни" ҳисобланадиган "Аугсбург" шанба куни Бременнинг "Вердер" клуби билан ҳисоблашиб кўради.  
Ўтган турда Мюнхендан мағлубият билан қайтган "Штутгарт" "Хоффенхайм"ни меҳмон қилади.

Мағлубиятлар гирдобида қолган "Гамбург" бу сафар "Бавария" билан тўқнаш келади. Бу ўйинда мюнхенликлар асосий фаворит саналишади. Франк Риберининг бу учрашувда майдонга тушолмасиги "Бавария"нинг асосий йўқотиши ҳисобланади. Жароҳатларидан аста-секин фориғ бўлиб, ўз формасини тиклаб бораётган Арьен Роббен учрашувда иштирок этиши мумкин. Майдон эгалари бу беллашувда катта мўъжиза ва бирдамлик эвазига нимагадир эришишлари мумкин. Чунки "Гамбург" ҳозирда ўзининг энг ёмон спорт формасида. "Бавария" эса аста-секин ўз ўйини тонусини ошириб бормоқда.

Турнинг яна бир қизиқарли баҳси "Падерборн" ва "Ганновер" ўртасида кечади. Айни пайтда бу икки жамоалар чемпионатни  мағлубиятсиз давом эттиришмоқда ва турнир жадвалининг юқори ўринларида боришмоқда. Бу тўқнашув қизиқарли ва кескин курашлар бой бўлиши аниқ. Қайсидир жамоа ўзининг муваффақиятли стартини бузиб қўйиши мумкин. Бу қайси жамоа бўлади? Айнан шу саволнинг жавоби учрашувни кескинлашишига арзийди ва бунинг бош сабабчиси саналади.

Юрген Клоппнинг "Боруссия"си бу турда "Майнц" меҳмони бўлади. Одатда бу жамоалар ўртасида кечадиган ўйинлар ҳар доим юқори темп остида ўтиб келади. Бу сафарги "жанг" ҳам аввалгиларидан қолишмаслиги аниқ. Марко Ройснинг хизматларидан фойдалана олмайдиган дортмундликлар ўзларининг собиқ етакчилари, айни пайтда жамоага қайтган Кагава билан "Майнц"га қарши саф тортишади. Ўтган турда ўз қайтишини гол билан нишонлаган Кагава бу сафар ҳам жамоасини ўз ортидан етаклай оладими-йўқми? Бу саволнинг жавобини билиш қизиқ бўлиши табиий.



Якшанба куни эса яна иккита қизиқарли баҳс немис футболи ишқибозларини кутиб турибди.
"Вольфсбург" номи остидаги "бўрилар" "аспиринликлар" лақабли "Байер" жамоасини ўз майдонида синовдан ўтказади. Турнир жадвалидаги якка пешқадамликни ўтган турдан сўнг топшириб қўйган "Байер" сешанба куни Францияда "Монако"га ютқазиб қўйди. Европа чемпионлар лигасидаги муваффақиятсизликдан сўнг, улар ўз мухлисларини хушнуд этиш мақсадида "бўрилар"ни "ўлжа"сига айланмасликка ҳаракат қилишади.

Турнинг сўнгги ўйини эса "Кёльн" - "Боруссия М" ўртасида бўлиб ўтади. Бундеслигага бу мавсумда қайтган "Кёльн" ҳозирча ўз дарвозасидан бирорта ҳам тўп олиб чиққани йўқ. Мёнхенгладбахнинг "Боруссия"сининг дастлабки иши уларни дарвозасини "ўққа" тутиш бўлади. Бу ишни меҳмонлар қай даражада амалга ошира олишади ёки йўқ буни ўйиндан сўнг билиб оламиз.


Бундеслига, 4-тур.

19 сентябрь, жума.

"Фрайбург" - "Герта" (23:30 "НТВ-ПЛЮС Футбол")

"Баденова-Штадион" стадиони.

Йўқотишлар: Даниэль Бац, Денис Пергер, Кристофер Жюйен, Станко, Дани Шахин, Адмир Меҳмеди — Саша Бурхерт, Герсберг, Бастианс, Лангкамп, Платтенхардт, Янкер, Бен-Хатира, Жигержи, Баумйохан, Вагнер.

20 сентябрь, шанба.

"Шальке" - "Айнтрахт Ф" (18:30 "НТВ-ПЛЮС Спорт Онлайн")

"Фелтинс-Арена" стадиони.

Йўқотишлар: Гифер, Матип, Хёведес, Сантана, Солашинац, Фарфан, Зоботтка, Горецтка — Ланиг, Флум, Киттель, Герезгихер, Розенталь, Вальдес, Вальдшмидт.


"Аугсбург" - "Вердер" (18:30)

"SGL Арена" стадиони.

Йўқотишлар: Гелиос, Фрамбергер, Ридер, Моравек, Экин, Райнталер, Уде  — Хусич, Цандер, Гебре Селасси, Йилдирим, Хаке, Баргфреде.


"Гамбург" - "Бавария" (18:30 "Спорт Хит")

"Имтех Арена" стадиони.

Йўқотишлар: Цолльнер, Райкович, Янсен, Иличевич, Рафаэл ван дер Варт, Штайнманн, Филипп Мюллер, Юнг, Нафиу, Байстер  — Бадштубер, Швайнштайгер, Алькантара, Рибери, Мартинез.


"Штутгарт" - "Хоффенхайм" (18:30 "НТВ-ПЛЮС Спорт Плюс")

"Мерседес-Бенц-Арена" стадиони.

Йўқотишлар: Влаходимос, Ляйбольд, Сарарер, Хольцхаузер, Ялчин, Мохаммед Абделлауэ, Гинчек — Кастельс, Штольц, Ким Жин Су, Аклогума, Бичакчич, Амири.


"Падерборн" - "Ганновер" (18:30)

"Парагон" стадиони.

Йўқотишлар: Бурхерт, Бертельс, Амеддик, Велькер, Лопес, Меха, Шаглик, Майер — Миллер, Хоффманн, Тескер, Баллас, Тайхгребер, Ранкович, Штиндль, Дирссен, Эрнст, Сане, Приб, Сулеймани.


"Майнц" - "Боруссия Д" (21:30 "НТВ-ПЛЮС Футбол2")

"Кофас-Арена" стадиони.

Йўқотишлар: Пак Жу Хо, Шильк, Новески, Кох, Паркер, Силшкович, Рукавица  — Аломерович, Хуммельс, Пишчек, Ройс, Блашчиковски, Шахин, Кирх, Кель, Гюндоган, Чи Дон Вон.


21 сентябрь, якшанба.

"Вольфсбург" - "Байер" (18:30 "НТВ-ПЛЮС Футбол2")

"Фольксваген-Арена" стадиони.

Йўқотишлар: Тельке, треш, окс, Лопес, Сегуин, Перишич, Завада  — Пападопулос, Топрак, Брадт, Рольфес.


"Кёльн" - "Боруссия М" (21:30 "НТВ-ПЛЮС Футбол2")

"Рейн Энерги Штадион" стадиони.

Йўқотишлар: Марсель Шуен, Швенто, Голобарт, Нагасава, Хельмес  — йўқ.


Германия чемпионатини томоша қилинг ва қизиқарли баҳсларни ўтказиб юборманг. Ҳақиқий футбол лаззати бундеслига ўйинларида мужассам.

Шаҳбоз Беғамов