"Маргарет Тэтчер, эшитяпсанми, сайлов кампаниянг қизиган пайтда менда сенга бир хабар бор..."

Норвегия терма жамоаси охирги март 1998 йилги мундиалда иштирок этган. Жамоа 1938, 1994 йилларда ҳам Жаҳон чемпионатида қатнашган. Аммо ҳозир 1982 йилги ЖЧ саралаши доирасидаги ўйинни ёдга оламиз.

1981 йилнинг 9 сентябрь куни Ослодаги "Уллевол" стадионида Норвегия ва Англия ўртасида Испания мезбонлигидаги Жаҳон чемпионати  саралаши доирасидаги ўйин бўлиб ўтган.

Ўша ўйинда мезбонлар Англияни 2:1 ҳисобида сенсацион тарзда мағлуб этган ва норвегиялик шарҳловчи Бьёрге Лиллелиен жонли эфир вақтида ўзининг ҳиссиётларини ушлаб тура олмай, ажойиб монологни дунёга келтиради. Айнан ўша монолог Лиллелиенни жаҳонга машҳур қилади ва дунёнинг турли бурчакларида ҳамон унинг ўша шарҳига пародиялар айтиб турилади.

Дастлаб 15-дақиқада инглизлар Браян Робсоннинг голи эвазига ҳисобни очишган. 35-дақиқада Том Лунд ҳисобни тенглаштирди. 41-дақиқада Халлвар Торесен гол уриб, Норвегияни олдинга олиб чиққан - 2:1. Ўйин тугаши билан шарҳловчи хурсандлигидан мана шу монологни "яратган" (агар инглиз тилини тушунсангиз видеони кўрганингиз маъқул):

"Биз дунёда энг зўрмиз! Биз дунёда энг зўрмиз! Биз Англияни футболда 2–1 ҳисобида енгдик!! Бу мутлақо ҳайратланарли! Биз Англияни енгдик!

Англия – қаҳрамонлар туғилган юрт.

Лорд Нелсон, Лорд Бивербрук, Сэр Уинстон Черчилль, Сэр Энтони Иден, Клемент Эттли, Генри Купер, Леди Диана – биз уларнинг ҳаммасини енгдик.

Биз уларнинг ҳаммасини енгдик!

Маргарет Тэтчер, эшитяпсанми?

Маргарет Тэтчер, сайлов кампаниянг қизиган пайтда менда сенга бир хабар бор.

Менда сенга хабар бор: Биз Англияни жаҳон чемпионатида футболдан чиқариб юбордик.

Маргарет Тэтчер, сенинг тилингда, Нью-Йоркдаги Мэдисон Сквер Гарден атрофидаги бокс барларида айтилганидек:

"Сенинг йигитларинг қаттиқ мағлубиятга учради! Сенинг йигитларинг қаттиқ мағлубиятга учради!"

Аммо шарҳловчининг шунча хурсандчилиги узоққа чўзилмайди Норвегия охирги турда сафарда Венгрияга ютқазиб саралаш гуруҳида охирги ўринни эгаллайди. Англия эса ўз майдонида Венгрияни мағлуб этиб Жаҳон чемпионатига чиққан эди. Аммо 1987 йилда 60 ёшида вафот этган Бьёрге Лиллелиеннинг ушбу ўйиндаги шарҳи тарихдан абадий жой олди.