10 нафар энг фойдали осиёлик футболчи (Улар орасида бизникилар ҳам бор)

Бизни хурсанд қилган жиҳати шундаки, улар орасида икки нафар юртдошимиз ҳам бор. Булар - Одил Аҳмедов билан Виталий Денисов. Қуйида футболчилар ўнлигини рейтинг асосида келтириб ўтамиз.  

10-ўрин. Виталий Денисов
(Клуби - “Локомотив” Москва, трансфер қиймати: 7 млн. доллар)
Гарчи Ўзбекистон терма жамоаси жаҳон чемпионатига чиқа олмаган бўлса-да, саралаш баҳсларида бир қатор футболчилар ўзларини кўрсата олишди. Шулардан бири чап қанот ҳимоячиси Виталий Денисовдир. Ҳозир фаолиятини Москванинг “Локомотив” клубида давом эттираётган Денисов Россия чемпионатида ҳам кўзга кўринган футболчилар сирасига киради. Унинг трансфер бозоридаги нархи 7 миллион АҚШ долларига баҳоланяпти. “Днепр” сафида олти мавсумни ўтказган Денисов “Локомотив”га келгач, ўзини йўқотиб қўймади ва тезда янги жамоаси ўйинига киришиб кета олди.



9-ўрин. Ку Жа Чол
(Клуби - “Майнц”, трансфер қиймати: 7 млн. доллар)
Жанубий Кореялик Ку Жа Чол ҳам Осиёда ўзига яраша машҳур футболчи ҳисобланади. У ҳозирда Германия чемпионатида тўп тепмоқда. Бунгача “Вольфсбург” ва “Аугсбург” сафида ҳаракат қилган Ку Жа Чол кейинчалик “Майнц” сафига ўтиб кетди. Бу футболчини “Бавария” мухлислари ҳамон яхши эслаб қолишган. Чунки у 2012 йил Франк Рибери билан жанжаллашиб қолганди. Кореялик ҳужумчи бу йилги жаҳон чемпионатида Жазоир термасига ҳам гол уришга муваффақ бўлди.



8-ўрин. Шинжи Оказаки
(Клуби - “Майнц”, трансфер қиймати: 7,7 млн.доллар)
Япония терма жамоаси аъзоси Шинжи Оказаки ҳам Европада ўзини кўрсатаётган осиёликлар сирасига киради. У терма жамоа сафида 39та гол уриб, тўпурарлар орасида учинчи ўринда кетяпти. Ўтган йил Оказаки клуб миқёсида 35та ўйин ўтказиб, 15та гол урганди. Унинг трансфер қиймати 7 миллион доллардан сал зиёдроққа баҳоланяпти. Унинг жамоаси бундеслигада 6-ўринда, Оказаки эса бешта гол билан тўпурарлар пойгасида иккинчи ўринда бормоқда.



7-ўрин. Одил Аҳмедов
(Клуби - “Краснодар”, трансфер қиймати: 8,5 млн. доллар)
Терма жамоамизнинг яна бир вакили Одил Аҳмедов ҳам мазкур рўйхатдан жой олди. Трансфер суммаси 8 миллион доллардан ортиқ баҳоланаётган Аҳмедов Россия чемпионатининг энг яхши марказий ярим ҳимоячиларидан бири ҳисобланади. Аввалига “Анжи” сафида ўзини кўрсатган Одил кейинчалик “Краснодар” сафига ўтишни маъқул кўрди. Бу футболчига шунингдек “Милан” ва “Арсенал”дан ҳам таклиф тушганди, лекин Аҳмедов ҳозирча Россияда қолишни лозим топди.



6-ўрин. Атсуто Учида
(Клуби - “Шальке 04”, трансфер қиймати: 10 млн.доллар)
2010 йил “Кашима Антлерс”дан “Шальке 04” сафига бориб қўшилган Учида айни пайтда Германия чемпионатининг янг яхши ўйинчиларидан бири бўлиб турибди. Унга белгиланган трансфер нархининг ўзиёқ Учида қандай савиядаги футболчи эканлигини айтиб турибди. 2008 йил терма жамоада ўз дебютини ўтказган япониялик футболчи шундан бери 71та ўйинда иштирок этишга улгурди. Шунингдек, 2010 ва 2014 йилги жаҳон чемпионатида қатнашди.



5-ўрин. Ки Сунг Ёнг
(Клуби - “Суонси”, трансфер қиймати: 11,5 млн.доллар)
“Сандерленд” таркибида ижара асосида тўп тепгани Ки Сунг Ёнг учун катта тажриба мактаби бўлди. У ҳозирда “Суонси”нинг асосий футболчиларидан бири. Қолаверса, кореялик футболчи уч йилни “Селтик” таркибида ўтказган. Бу ўйинчи Жанубий Корея миллий терма жамоасининг ҳам асосий ўйинчиси ҳисобланади. У терма либосида 64 ўйинда майдонга тушиб, бешта гол урган.



4-ўрин. Кейсуке Хонда
(Клуби - “Милан”, трансфер қиймати: 17 млн.доллар)
Кейсуке Хондани мухлисларга алоҳида таништириб ўтириш шарт эмас. Унинг ўйинларини жуда кўпчилик кўрган. Хонда айни пайтда “Милан”нинг энг асосий фигураларидан бири. “Милан” япониялик ярим ҳимоячини эркин агент сифатида ЦСКАдан ўз таркибига қўшиб олганди. Шубҳасиз, Хонда Япония терма жамоасининг ҳам энг яхши футболчиси ҳисобланади. У терма таркибида 61 ўйинда майдонга тушиб, 23та гол урган.



3-ўрин. Юто Нагатомо
(Клуби - “Интер”, трансфер қиймати: 19,8 млн.доллар)
Италияда тўп тепаётган яна бир япониялик футболчи бу Юто Нагатомо. Нагатомо “Интер” таркибида ажойиб ўйинларни ўтказмоқда. Бунгача ҳимоячи озроқ муддат “Чезена” таркибида фаолият олиб борганди. Нагатомо учун Осиё Кубоги-2011 муваффақиятли келиб, унинг учун катта тажриба бўлганди. Бу ҳимоячи “Интер” сафида Скудеттони қўлга киритишни кўзламоқда.



2-ўрин. Сон Хёнг Мин
(Клуби - “Байер”, трансфер қиймати: 19,8 млн.доллар)
Ҳозирда “Байер”ни бу футболчисиз тасаввур қилиш қийин бўлиб қолди. Сон Хёнг Мин майдонга тушган ўйинларда ҳам ўзи гол уряпти, ҳам голли пасларни амалга оширмоқда. Бу футболчини трансфер бозоридаги нархи салкам 20 миллион долларга баҳоланган. Мутахассислар эндигина 22 ёшни қарши олган ярим ҳимоячининг келажаги порлоқ дейишмоқда.



1-ўрин. Шинжи Кагава
(Клуби - “Боруссия Д”, трансфер қиймати: 21,2 млн.доллар)
Европада ўзини кўрсатаётган осиёлик футболчилар рейтингида биринчи ўринни Шинжи Кагава банд этди. МЮ таркибига киришиб кета олмаган Кагава “Боруссия Д” сафига қайтгач, яна ўзини кўрсата бошлади. Унинг трансфер нархи ҳам осиёликлар орасида энг юқориси ҳисобланади. Кагава ҳам терма, ҳам клубининг асосий ўйинчиси ҳисобланади. Япониялик ярим ҳимоячи гол уриш билан бирга голли вазиятларни ҳам юзага келтира олиши билан донг таратган.



Х.Холиқов тайёрлади.