Туринда бугун раҳбарият ва Аллегри томонидан "Ювентус"нинг келажаги муҳокама қилинади

Бу ҳақда Италия матбуоти, хусусан "La Gazzetta Dello Sport" нашри маълум қилди.

Учрашувда "Ювентус" бош менежери Беппе Маротта, спорт директор Фабио Паратити, вице-президент Павел Недвед ва бош мураббий Массимилиано Аллегри қатнашиши кўзда тутилган.

Бу учрашув чоғида Аллегрининг янги шартномаси, жамоанинг трансфер сиёсати ва янги мавсум режалари каби масалалар кўриб чиқилади. "Ювентус" катта эҳтимол билан Аллегри билан 2021 йилга қадар шартномани узайтириш ниятида. Шунингдек, жамоанинг ёзда трансфер ойнасида харид қилиниши керак бўлган футболчилар рўйхати муҳокама қилинади.

Аллегри раҳбариятдан келаси мавсумда жамоанинг сифати тушиб кетмаслиги лозимлигини сўраган. Учрашувда жамоадан яна қайси футболчилар кетиши мумкинлиги аниқлаштириб олинади.

Ҳозиргача "Ювентус" билан афсонавий дарвозабон Жанлуижи Буффон, Штефан Лихштайнер ҳамда Квадво Асамоа каби футболчилар хайрлашишди. Шунингдек, жамоа ҳужумчиси Марио Манжукич борасида Хитой ва Бундеслига клубларидан таклифлар келиб тушган. Стефан Стураро ва Клаудио Маркизио борасида ҳам "Ювентус"га таклифлар мавжуд ва бу масалалар ҳам бугунги йиғилишда мураббий Аллегри билан биргаликда кўриб чиқилади.
"Ювентус"нинг ҳимоя чизиғи вакиллари Алекс Сандро ва Медҳи Бенатиянинг ҳам жамоадаги келажаги катта эҳтимол билан бугунги учрашувда ҳал бўлади.

Европа чемпионалар лигаси финалидан сўнг "Ливерпуль" ярим ҳимоячиси Эмре Жан билан шартнома имзоланиши кутилмоқда. Қўшимчасига жамоага янги мавсум олдидан ижарада бўлган Пьяца, Кальдара ҳамда Спинаццола қайтишади.

Йиғилишда айнан шу масалалар ва яна қайси чизиқлар бўйича трансферлар амалга ошириши лозимлиги ҳал этилади.