Суҳроб Султонов: "1 очко Африкада ҳам қийматли..."

Ўйиндан кейин мавсумдаги 2-пеналтисини қайтариб, учрашувнинг энг яхши футболчиси деб топилган Суҳроб Султонов билан суҳбатлашдик. "Бунёдкор" посбони дастлаб дерби ҳақидаги саволимизга жавоб қайтарди: 

- Ўйин осон ўтмаслиги аниқ эди. "Локомотивга" ҳам, бизга ҳам 3 очко керак. Шундай бўлди ҳам. Дастлаб, 1 киши кам бўлиб қолдик. Кейин бизнинг дарвозамизга пеналти қўйилди. Урган голларимиз инобатга олинмади...

- Ҳакамлик бўйича эътироз билдирмоқчимисиз?

- Йўқ, бошқача тушундингиз. Мен ҳакамлар ҳақида ҳеч қачон гапирмаганман, гапирмайман ҳам. Аскерни яхши танийман. Агар иқтидори бўлмаса, қўлига ҳуштак олмасди. 

- Дуранг сизни қониқтирдими?

- Алҳамдулиллаҳ! Йигитлар меҳнат қилишди, улар учун хурсандман. 1 очко, Африкада ҳам очко. Бугун менга ҳам имкон берилди. Ўзим учун ҳам хурсанд бўлдим.

- Олдинги баҳсларда захирада қолганингиз ҳақида сўрамоқчи эди. Бу йил "Бунёдкор" сиз майдонга тушмаган 5 баҳсда 1 очко олди. Шунга қарамай, захирада қолишингиз нима билан боғлиқ?

- Бу менга боғлиқ эмас. Тақдир шунақа, кеча эмас, бугун ўйнашим керак экан. Сира ҳам нолимайман. 

- Демак, олдинги ўйинларда жисмоний ҳолатингиз билан боғлиқ муаммо бўлмаган?

- Йўқ. Барча ўйинларга максимум тайёрланяпман. Майдонга тушиш-тусмаслигимни мураббий ҳал қилади.