Ойбек Қиличев: “Яна таклиф тушса четга кетишга тайёрман"

Шаржанинг “Ал Шааб” клубида иккинчи даврани ўтказган жиззахлик футболчи ўзидан яхши таассурот қолдиришга ҳаракат қилди. Аммо унинг жамоаси элитада ўз ўрнини сақлаб қола олмади ва охирги ўринни эгаллаб биринчи лигага тушиб кетди. Натижада клубдаги бошқа легионерлар қатори Ойбек Қиличев ҳам уйга қайтиб келишга мажбур бўлди. Айни пайтда Қиличев “Пахтакор” сафида шуғулланиб турибди, ўзининг айтишича, яқин келажаги шу кунларда ҳал бўлади. Биз эса фурсатдан фойдаланиб футболчи билан учрашиб, ундан интервью олдик.

-   Ойбек, БАА чемпионатида қисқа муддат фаолият олиб бордингиз. Дастлаб шу ҳақда нима дея оласиз?
-   Тўғри, у ерда кам ўйнадим. Биринчи даврадан сўнг юзага келган танаффусда БААга кетиб, у ёқда иккинчи даврани ўтказдим. Лекин шунга қарамай   , ўзим учун кўп нарса олдим. БАА чемпионати кучли экан, уларда четдан келиб ўйнаётган легионерлар эвазига савия юқори экан. Агар яна таклиф тушадиган бўлса, бориб ўйнашга тайёрман.



-   “Ал Шааб”га боргач клуб билан ярим йиллик шартнома туздингиз. Мусобақа охирида жамоа сўнгги ўринни эгаллаб биринчи лигага тушиб кетди. Шундан кейин нима бўлди?
-   Раҳбарият бизга ҳамма уйига бориб дам олиши кераклигини ва шартнома бўйича кейинроқ гаплашишини айтди. Агентим Равшан Салимов ҳаммасидан хабардор ва бирор янгилик бўлса менга етказади. Шу боис ҳозирча нима рўй беришини кутяпман.
 
-   Жамоангиз янги мавсумни биринчи лигада ўтказади. Мабодо қуйи лигада тўп тепиш варианти юзага келса қандай йўл тутасиз?
-   Ҳаммаси таклиф қандай бўлишига боғлиқ. Менимча, яқин кунлар ичида кўп нарса ойдинлашади. Шундан сўнг фаолиятимни қаерда давом эттириш маълум бўлади.

-   Легионер бўлиб ўйнаш қийин эканми?
-   Футбол ўйнаш ҳеч қаерда осон эмас. Хоҳ ўзимизда, хоҳ четда. Тўғрисини айтишим керак, жамоамиз чемпионатда кучли ўйин намойиш эта олмади. Натижада биринчи дивизионга тушиб кетдик. Аммо легионер сифатида тўп суриш менга ёқди. Ўзимни янги чемпионатда, янги муҳитда синаб кўрдим. Клуб раҳбарияти ва мураббийлар штабида яхши таассурот қолдирдим деб ўйлайман.
 
-   БАА чемпионатида тўп сураётган легионерларга нисбатан матбуот ва мухлислар талабчан эканми?
-   Уларни бемалол анча талабчан дея оламан. Ҳар бир ўйиндан сўнг мухлислар йиғилиб ким яхши ҳаракат қилган бўлса ўшанга раҳмат айтишади, биргаликда суратга тушишади. Жамоамизда Қатар ва Венесуэладан келган футболчилар ҳам бор эди, уларнинг ўйини қовушмаган пайтда мухлислар ҳуштакбозлик қилишарди.

-   “Ал Шааб”нинг уй учрашувларига мухлислар ташрифи қандай бўларкан?
-   Кўплаб араб давлатларида футболни ёқтиришади. Шу жумладан, БААда ҳам футболни жуда қадрлашади. Мухлислар ташрифи озайгани йўқ. Бизни ҳар доим қўшиқ айтиб қўллаб туришди.
  


-   Тил бўйича муаммо юзага келмадими? Бу борада сизга ким ёрдам берди?
-   Клуб бош мураббийи серб бўлгани учун русчани биларди. Шу боис мураббий билан мулоқотда муаммо чиқмади. Ўйинчилар билан эса асосан инглиз тилида гаплашишга ҳаракат қилдим. Икки ой деганда тилниям ўрганволдим.
 
-   Умуман “Ал Шааб”га боришингиз қандай рўй берганди?
-   Ўша пайт Тошкентда энди қишки йиғинни бошлагандик. Бир куни агентим Равшан ака Салимов қўнғироқ қилиб БАА клубидан таклиф тушаётганини айтди. Кейин “Пахтакор” раҳбарияти билан гаплашиб олгач, Шаржага йўл олдим ва ижара асосида олти ойлик шартнома туздим.
 
-   Шаржага боргандан сўнг кутиб олиш, жойлаштириш ва таништирув қандай кечди?
-   Клуб вакиллари аэропортнинг ўзидаёқ кутиб олиб, меҳмонхонага жойлаштиришди. Бир ҳафта ичида тиббий кўрикдан ўтиб, шундан сўнг шартнома имзоладим. Ўйиндан икки-уч кун олдин эса янги футболчиларни кенг жамоатчиликка таништирув маросими ўтказилди. Бир сўз билан айтганда ҳаммаси ажойиб кечди. Биринчи ўйинда ғалаба қозондик. Ҳамманинг кайфияти зўр эди. Лекин орадан кўп ўтмай жамоамиздан омад юз ўгира бошлади.
 
-   Клуб меҳмонхонага жойлаштирди дедингиз. “Ал Шааб”нинг ўз қароргоҳи йўқми?
-   Йўқ экан. Улар ўйиндан бир кун олдин мен турган меҳмонхонага тўпланиб ҳамма ётиб қоларкан. Лекин бу барча легионерлар меҳмонхонада туради дегани эмас. Агар хоҳласангиз, раҳбарият сизга ижарага уй олиб бериши мумкин. Мен учун меҳмонхона қулай эди, шу боис уй сўрамадим.

-   Клубда футболчиларга бўлган эътибор қандай экан?
-   Уларда ўйинчилар жуда эъзозланади. Фақат яхши ўйнасангиз бўлди, қандай муаммо бўлса ҳал қилиб беришади.
 
-   Об-ҳаво, таомлар ва жамоадаги муҳит сизга маъқул келдими?
-   У ерда об-ҳавонинг қанчалик иссиқлигини ўзингиз ҳам яхши биласиз. Таомлар ҳам ўзимизникига ўхшаб кетади, ўрганиш қийин бўлмади. Жамоадаги муҳит ҳам яхши эди.
 
-   Араб футболчиларининг характери ҳақида нима дея оласиз?
-   Уларнинг аксарияти хушчақчақ. Араблар четдан келган легионерлар билан тезда чиқишиб кетишади, уялиб ўтиришмайди. Ёки бўлмаса сен менинг ўрнимда ўйнаяпсан, менга рақобатчисан деган фикр умуман хаёлига келмайди. Кўпчилиги меҳмондўст, бизга ўхшаганларни тез-тез уйларига чақириб туришади.
 
-   Бир гал араб футболчилари ҳақида фикр билдираётиб улар футболга ҳавасаки қарашади дегандингиз. Шу ростми?
-   Энди нима десам экан, у ерда машғулот пайтида ҳамма профессионал тарзда ўз ишини қилади. Ҳеч ким бекор ўтирмайди. Лекин араб футболчилари бизга ўхшаб фақат футболдан келадиган пулга қараб қолишмаган. Уларда пул шундоқ ҳам кўп. Араблар кўп жон куйдиришни исташмайди, футболниям қизиқиш учун ўйнашади.



-   Шунга қарамай, БАА миллий терма жамоаси кучли, уларда яхши футболчилар кўп. Бу нима билан боғлиқ бўлиши мумкин?
-   Мен ҳам бу борада кўп ўйлайман. Биласизми, уларда иқтидорли футболчилар кўп, бундан ташқари улар футболни натижа учун ўйнамайди. Ўйин қовушса қовушди, қовушмаса йўқ. Бундан кўп муаммо ясашмайди. Бизда эса натижа бирламчи ўринда туради. Ютқаздингми, сендан ёмони йўқ. Балки шунинг учун яхши футболчиларнин тарбиялаш кейинги планга қолиб кетаётган бўлса керак.

-   Жамоангиз олий лигада қолиши мумкинмиди?   
-   Қолиши мумкин эди, бироқ ҳаммасига ўзимизга айбдормиз. Чунки аксарият футболчилар ўйинни ташлаб юборишди. Натижада биринчи лигага тушиб кетдик.
 
-   БАА чемпионатида ҳам худди биздаги каби бир кун олдин ўринбосарлар баҳси ўтказиладими?
-   Уларда ҳам ўринбосарлар мусобақаси бор, лекин бизникига ўхшаб бир кун олдин эмас, балки асосий таркиб ўйнаганидан бир кун кейин бўлиб ўтади. Бундан ташқари, уларда асосий таркиб уйда ўйнаса ёшлар сафарда ўйнайди, ёки бўлмаса акси бўлади.
 
-   Бошқа шаҳарларга бориш қандай амалга оширилар экан?
-   Шаржанинг ўзида олий лиганинг учта клуби бор. Энг узоқ қилган сафаримиз Абу Даби бўлди ва у ергача автобусда уч соат юрдик. Дубай эса бир қадам, шундоқ ёнгинамизда. Айтиб ўтганимдек, ўйиндан бир кун олдин меҳмонхонада тўпланиб, барча сафар учрашувларига жамоа автобусида қатнадик. Фақат Абу-Дабига бир кун олдин йўлга чиқамиз. Бошқа жойларга эса ўйин куни бордик.
 
-   Четда ўйнаб келгач, ўзингизда қандай ўзгаришларни сездингиз?
-   Биринчи навбатда одамнинг ўзига бўлган ишончи ортаркан. Биласиз, спортда ишонч жуда муҳим ҳисобланади. Футболчи ҳам токи ўз кучига ишонмас экан, четга чиқмагани маъқул.

-   Вақт ўтиб “Ал Шааб”дан қандай хотиралар қолади?
-   Бу клуб менинг хориждаги илк жамоам бўлди. Шундай экан, “Ал Шааб” ҳар доим ёдимда қолади. Қисқа муддат фаолият олиб борган бўлсам-да, клубдан илиқ хотиралар қолди. У ерда нафақат футбол ўйнадим, балки араб дунёси маданияти билан яқиндан танишдим. Бундан жудаям хурсандман. Юқорида айтганимдек, яқин кунлар ичида четга кетишим ёки шу ерда қолиб “Пахтакор”да ўйнашим ҳал бўлади. Агар хориждан яна таклиф тушса, жон деб ўзимни синаб кўрган бўлардим.

Хайрулла Холиқов суҳбатлашди.