ЎФФ Президенти миллий терма жамоа мураббийлар штаби билан учрашди

30 декабрь куни ЎФФ биносида ташкилот Президенти Мираброр Усмонов Ўзбекистон миллий терма жамоаси мураббийлар штабини қабул қилди. Учрашув чоғида Мираброр Усмонов миллий терма жамоа бош мураббийи Миржалол Қосимов билан терма жамоанинг Осиё Кубогига тайёргарлиги ҳақида сухбат қурди. Бош мураббий терма жамоа Осиё Кубогига муносиб тайёргарлик кўрганини ва ушбу мусобақада совринли ўринларни эгаллаб терма жамоа мухлисларини хурсанд қилишни мақсад қилганини айтиб ўтди. Қосимовга кўра, миллий терма жамоа мазкур турнирда совринли ўринлардан бирини эгаллашни мақсад қилган.

ЎФФ Президенти Мираброр Усмонов мазкур мусобақа олдидан терма жамоа мураббийлар штабига, футболчиларга омад тилади ва Осиё Кубогидан катта ғалаба ва ёруғ юз билан қайтиб келишини тилади.
Осиё Кубогида иштирок этадиган 23 нафар футболчидан иборат таркиб ва делегация аъзолари 2 январь куни Австралиянинг Сидней шаҳрига учиб кетади. Ўзбекистон терма жамоаси Осиё Кубогидаги илк учрашувида 10 январь куни Сидней шаҳрида КХДР терма жамоасига қарши майдонга тушади. Мусобақанинг тўлиқ тақвими ҳақида аввалроқ маълумот берган эдик.