Миразиз Мирзааҳмедов: "Ўзбекистон-2 жамоасида ўзини кўрсатганлар Осиё чемпионатига бориши мумкин"

"Йигитлар кеча ҳам Қирғизистон билан ўйин ўтказишганди. Барибир чарчоқ аломатлари сезилиб қолди. Афғонистон жамоаси менда яхши таассурот қолдирди. Уларда ҳам футбол анча ривожлангани кўринди.

Жасур Абдураимов нега келмади? Кеча иккита ўйинда икки жамоани бошқарди. Бугун Тожикистон билан жуда муҳим ўйин бор. Шу боис Жасур Биродарович Ўзбекистон-1 жамоаси билан тонгги машғулотларни ўтказишга қарор қилди.

Ўйинлар вақтини мен ёки бош мураббий белгиламаймиз. Буни ташкилотчилар белгилашади. Тўғри иссиқда ўйнаш қийин, аммо унутмаслик керакки Осиё чемпионати Баҳрайнда бўлади. Бу мамлакат эса жуда ҳам иссиқ иқлимга эга.

Ҳакамлар ҳақида нима дейишим мумкин? Тўғриси бугун Шерзод Қосимов бошчилигидаги ҳакамлар менимча ҳеч қандай қўпол хатога йўл қўйишмади. Афғонистон мураббийи ҳакамлар ўзбекистонлик бўлгани учун уларга эътироз билдирди. Лекин мағлуб бўлган жамоа кўпинча ҳакамлардан айб қидиради. Ишонтириб айтаманки бугун бошқа мамлакат ҳакамлари ишлаганида ҳам биз ютардик.

Ўзбекистон-2 жамоасида ўзини кўрсатган 3-4 нафар футболчи Осиё чемпионатига бориши мумкин. Барчаси йигитларнинг ўзига ва ҳаракатига боғлиқ", - дейди Ўзбекистон U-19 ёрдамчи мураббийи Миразиз Мирзааҳмедов.

Нарзулла Сайдуллаев