“Металлург”: Водий сафарига тайёргарлик бошланди

Бу ўйин 21 июнь куни бўлиб ўтади. “Бунёдкор” жамоасига қарши кечган қийин учрашувдан кейин бекободликларга бир кунлик дам берилди ва уик-энддан эътиборан навбатдаги турга ҳозирлик жараёни бошланди. Ўз навбатида шанба куни пойтахтимиздаги ЖАР стадионида Ўзбекистон U-19 жамоаси билан назорат учрашуви ҳам бекободликларнинг “Навбаҳор”га қарши ўйинига тайёргарлик вазифасини ўтаб берди.

“Металлург” душанба куни Наманган сари йўлга чиқади. Ўтган мавсум бекободликлар Наманганда мезбонлар билан жанговор дурангга имзо чекишганди. Биринчи даврада 2-турда кечган мазкур учрашувда ҳисобни меҳмонлар вакили Алишер Зиёвуддинов очганди. Аммо биринчи бўлимнинг ўзидаёқ майдон эгалари Азим Аҳмедов ва Дилшод Жабборовнинг голлари эвазига олдинга чиқиб олишганди. “Навбаҳор” мазкур учрашувда ғалаба “чўнтакда” деб турган пайтда меҳмонлар сўнгги ҳужумда пенальти ишлашган. 11 метрлик нуқтадан жарима зарбасини Дилмурод Каримов аниқ амалга ошириб, дурангни расмийлаштирганди – 2:2.

Бу йил Наманганда бўлиб ўтадиган ўйинни андижонлик ҳакамлар бригадаси бошқариб боради. Бош ҳакам Темур Тўхтасиновга қанотларда Анвар Маражабов ҳамда Зиёдулло Абдураҳмоновлар ёрдам беришади. Заҳирадаги ҳакам гулистонлик Бахтиёр Юлчараев.

Шу ўринда ўтган мавсум Темур Тўхтасинов “Металлург” иштирокидаги учта учрашувда ишлаганлигини айтиб ўтиш лозим. Бекободликлар сафарда “Навбаҳор” билан дуранг ўйнаган, “Қўқон 1912” жамоасига имкониятни бой бериб қўйган ва Самарқанднинг “Динамо” жамоасини ўз уйида мағлубиятга учратган. Бу йилги мавсумда эса андижонлик ҳакамлар “Металлург” иштирокидаги ўйинга биринчи марта тайинланди.

«Навбаҳор» (Наманган) – «Металлург» (Бекобад)
Ҳакамлар: Т. Тўхтасинов (Андижон), А. Маражабов (Андижон), З. Абдураҳмонов (Андижон), Б. Юлчараев (Гулистон)
Назоратчи: С. Эрматов (Тошкент).
ЎзПФЛ вакили: Б. Маметов.