Маъруф Зокиржонов: “Суперлигада ҳам барқарор ўйнаб кетишимга ишонаман”

Аниқроғи Зокиржонов бу сафар “Цементчи” таркибида кичик олтин медалларни қўлга киритди. Чап қанотнинг универсал футболчиси бўлган Маъруф якунланган мавсумда “Цементчи” клуби талқинига кўра, йилнинг “Энг яхши ярим ҳимоячиси” дея эътироф этилди. Шу муносабат билан яқинда футболчи билан боғланиб, айрим саволлар билан мурожаат қилдик.

- Якунланган мавсум нимаси билан эсда қоларли бўлди? Ижобий ва салбий жиҳатларни айтиб берсангиз.
- Поёнига етган йил унутулмас воқеаларга бой бўлди. Сабаби биз “Цементчи”ни олий лигага олиб чиқдик. Раҳбарият томонидан қўйилган вазифани аъло даражада уддаладик. Бу албатта, клубнинг ҳар бир аъзосини қувонтирмасдан қолмайди. Мавсум-2017да  ижобий жиҳатлар кўп бўлди. Хусусан ғалаба қозонган ўйинларимиз беҳад қувонтирди. Айниқса сафарда “Андижон” устидан қозонган йирик 4:0 ҳисобидаги ғалабимиз унутилмас бўлди. Боиси шу куни биз асосий принципиал рақибимиз устидан муҳим ғалабани қўлга киритдик.  Салбий жиҳатлар деб эса кутилмаганда йўқотган очколаримиз бўлди.

- Адашмасам иккинчи бор биринчи лига клуби билан олий лигага чиқдингиз. Агарда бу йил хам яна биринчи лиганинг етакчи клубидан таклиф бўлса қандай йўл тутасиз?
- Ҳа тўғри таъкидлаб ўтдингиз. Илгари “Қўқон-1912” жамоаси билан иккинчи ўринни эгаллаб, кучлилар сафига чиққандик. Бу сафар “Цементчи”ни чемпион қилдик. Имкон қадар жамоа олдига қўйилган вазифани бажариш учун ўз хиссамни қўшишга харакат қилганман. Бу йил супер лига жамоасида ўйнашни истайман. Агарда буни иложи бўлмаса, у холда про лиганинг етакчи клубидан таклиф тушгудек бўлса, бориб ёрдам беришга тайёрман. Асосийси футбол ўйнайман. Севимли касбим билан шуғулланаман.

- “Цементчи”да ойлик маош ва мукофот пуллари анча кам дейишади. Шунга қарамай жамоа ўз олдига қўйилган вазифани уддалади. Бу қандай амалга ошди?
- Қувасой жамоасида бир мавсум ўйнаб, шуни билдимки, у ерда алдов деган нарса йўқ. Тўғри, ойлик маошлар катта суммада эмас. Лекин жуда кам ҳам деб бўлмайди. Муҳими ўз вақтида иш ҳаққингизни оласиз. Ўйиндаги ютуқ учун айтилган мукофот пуллари ҳам зудлик билан тарқатилади. Ҳеч ким бировнинг ҳаққига ҳиёнат қилмайди. Ҳозирги кунда бу жуда муҳим. Айнан шу омиллар ҳам кучлилар сафига чиқишимизда муҳим ўрин тутди. Бундан ташқари яна шуни ҳам айтиб ўтишни истардимки, бизда аҳил бир оила йиғилган. Жамоа аъзолари соддароқ айтганда, яримта гап билан бир-бирини жуда яхши тушунади. Иккига бўлиниб қолиш холатлари сира учрамади. Ҳамма бир бўлиб, мақсад сари курашди. Ёшлар катталарни хурматини жойига қўйган бўлса, катталар ёшларни қўллаб-қувватлади.  

-  Яқинда ўтказилган “Цементчи”нинг тақдирлаш маросимида, жамоангиз талқинига кўра, йилнинг энг яхши ярим ҳимоячиси деб топилдингиз. Шахсий фикриз - ўзизи кўрсатган ўйинингиздан қанчалик қониқиш хосил қилдингиз?
- Йилнинг “Энг яхши ярим ҳимоячиси” номинациясида ғолиб деб топишгани учун жамоамиз мураббийлари ва йигитларга раҳмат айтаман. Албатта бу мен учун кутилмаган совға бўлди. Чунки жамоада яхши савиядаги футболчилар жамланган. Футбол бу – жамоавий ўйин. Шахсий ютуқлар мен учун у қадар катта ахамият касб этмайди. Лекин барибир бирмунча ёқимли бўлди. Асосийси жамоамиз олдига қўйилган вазифани бажардик. Ўз ўйинимга келадиган бўлсак, тўлиқ қониқиш хосил қилдим деб айта олмайман. Назаримда футболчи ўзидан юз фоиз қониқса, харакатдан тўхтаб қолади. Янада кучлироқ бўлиш учун ўз устимда ишлашда давом этаман.    

-  “Цементчи”га ижара асосида ўтгандингиз. Хуқуқий жихатдан хозир ҳам “Қўқон-1912” га тегишли ҳисобланасизми?
- Тўғри, ўткан йили Қувасойда ижара асосида ўйнаганман. Лекин 31 декабрь куни қўқонликлар билан тузган битимим ўз кучини йўқотди. Ҳозирда эркин агент мақомидаги ўйинчиман. Шу фурсатдан фойдаланиб, “Қўқон-1912” жамоасининг мураббийлар штаби ва раҳбариятига ўз миннатдорчилигимни билдираман. У ерда уч йил ўйнадим. Яхши кунларни ўтказдим. Мен учун қадрли бўлиб қолади ҳамиша. Жамоанинг кейинги мавсумдаги ишларига омад тилайман.  

- Ўткан мавсум жамоангиз таркибида деярли ҳар бир баҳсда харакат қилдингиз. Энг асосийси етарлича ўйин амалиётига эга бўлдингиз. Супер лигада ҳам барқарор ўйнаб кетишингизга қанчалик ишонасиз?
- Ҳа, “Цементчи” таркибида фақат битта ўйинда иштирок этмадим. У ҳам бўлса қизил карточка туфайли, дисквалификация бўлгандим. Қолган баҳсларнинг барчасида ўйнадим. Албатта супер лигада ҳам ўйнаб кетишимга ишонаман. Бу кўпроқ мураббийга ҳам боғлиқ. Агарда мураббий сизга ишониб, қўллаб-қувватласа бемалол ўйнаб кетишингиз мумкин. Нафақат мен, балки ҳозирда жамоамиз ихтиёрида бўлган айрим йигитлар ҳам ўйнаб кета олишига ишонаман.

- “Цементчи”даги фаолиятингизни яна давом эттириш ҳақида бош мураббий ёки раҳбарият билан гаплашиб олдингизми?
- Ҳозирча бу борада жиддий тарзда гаплашилмади. Лекин шуни айта оламанки, “Цементчи”да қолиб жамоага супер лигада ҳам ёрдам бермоқчиман. Чунки бу ерда мени барча нарса қониқтирмоқда. Насиб қилса яқин орада яна шартномаларни узайтириш борасида ҳамма билан яна бошқатдан гаплашиб олинса керак.

- Якунланган мавсумда “Цементчи”нинг “Энг яхши ўйинчиси” деб кимни кўрсатган бўлардингиз?
- Бу борада алоҳида бир ўйинчини кўрсатишим нотўғри бўлса керак. Чунки футбол бу жамоавий ўйин. Юқорида айтиб ўтганимдек, бизда бир оила жамланган. Мақсадга эришиш учун ҳамма бир бўлиб харакат қилди.