Илҳом Шарипов: "Биринчи Лига баҳслари анча шиддатли ва кескин руҳда ўтмоқда"

- Анча асабий ўйин кузатилди. 8 та сариқ карточка ва битта четлатиш. Баҳснинг шу қадар кескин ўтишини кутганмидингиз?

- Чиндан ҳам жуда асабий ва шиддатли футбол намойиш этилди. Кутганимдек, «УзДонгЖу» жамоаси анча шаклланган ва тартибли ўйин намойиш этди. Йигитларимиз майдонда борини бериб тўп суришди. Ўйин сўнггига яқин рақибнинг бир киши кам бўлиб қолганлиги бизга қанотлар орқали ҳужум қилишимизга кўпроқ имконият берди. Натижада бундан фойдаланиб, қийин ўйинда ғалабага эришдик. Йигитлар ўйинидан қониқдим. Муҳим ғалабадан хурсандмиз. Жамоамиз мухлисларини қувонтиришда давом этишимиз керак.

- Азамат Бобожонов ва Виктор Клишинларнинг тикланиш жараёни қай даража кетмоқда?

- Бобожонов тиббий кўрикдан ўтди. Унинг оёғидаги жароҳати битиши учун 10 кунча вақт кетади. Ҳужумчимиз Виктор Клишин эса сафга қайтди. Насиб қилса, у Хоразм ва Нукусдаги кейинги тур ўйинларимизда майдонга тушади.

- Якунланган тўрт турт баҳсларидан сўнг турнир ҳақида қандайдир хулосалар қила оласизми?

- Биринчи Лига баҳслари анча шиддатли ва кескин руҳда ўтаётганлигини кўриб турибсиз. Айнан мана шу турнирда очиқ ва тезкор футболга гувоҳ бўлиш мумкин. Бу ерда ҳеч бир футболчининг номи ёки ёшига қаралмайди, барча ўзини кўрсатиш ва ғалаба қозониш учун бор куч ва имкониятини ишга солади.

«Динамо» Матбуот хизмати.