Икки хисса куч биланми ёхуд улар бугун собиқ жамоаларига қарши

Биринчи даврани бошқа бир жамоада ўтказиб, давралар оралиғида бошқа бир жамоага бориб кўним топган футболчилар ҳам талайгина топилади. Бугунги 14-тур ўйинларидан олдин эътибор қаратадиган бўлсак, бу борада бир нечта футболчиларни кўришимиз мумкин. 

"Сўғдиёна" - "Олмалиқ"
Икки йил давомида "Олмалиқ" либосида ҳаракат қилган Маъруф Муродов оралиқ танаффусда жамоаси билан хайрлашганди. Шундан сўнг футболчи олий лиганинг бошқа бир жамоаси "Сўғдиёна" йиғинида пайдо бўлди. Айтишларича Муродов иккинчи даврани жиззахликлар сафида ўтказиши аниқ бўлиб улгурган. Шу боис у бугун янги жамоаси таркибида собиқ жамоаси бўлмиш "Олмалиқ"қа қарши тўп суриши мумкин.

"Нефтчи" - "Шўртан"
Юзага келган танаффусдан унумли фойдаланиб, трансфер ойнасида сезиларли ўзгаришларга қўл урган "Нефтчи" ўз сафига бир қатор етакчи футболчиларни қўшиб олди. Хусусан мавсумнинг биринчи қисмини "Шўртан"да ўтказган Вячеслав Пономарёв эндиликда фарғоналиклар учун тўп сурадиган бўлди. Шунинг учун катта эхтимол билан бугун Пономарёв собиқ жамоасига қарши ўйнаши мумкин.

"Шўртан" жамоасига "Нефтчи"дан келиб қўшилган Азиз Алижонов ҳам бугунги ўйинда собиқ жамоасига қарши тўп суриши кутилаётганди. Аммо маълумотларга кўра, футболчи ҳар иккала жамоа келишувига кўра "Нефтчи"дан ижарага берилган ва у ушбу жамоага қарши ўйнамаслиги келишиб олинган.

"Динамо" - "Қизилқум" 
"Динамо" бош мураббийи Равшан Ҳайдаров ҳам оралиқ танаффусда жамоасини кучайтиришга ҳаракат қилди. Чизиқлар ўртасидаги рақобатни ошириш мақсадида собиқ жамоаси бўлмиш "Қизилқум"дан тўрт нафар ўзи яхши билан шогирдларини "Динамо"га чорлади. Булар Алишер Саматов, Азамат Абдуллаев, Фаррух Шотурсунов ва Аваз Агалиевдир. Биринчи даврада "Қизилқум" учун тўп сурган ушбу футболчилар бугун "Динамо" либосида ҳаракат қилиши кутилмоқда.

Биз юқорида собиқ жамоасига қарши тўп суриши мумкин бўлган ўйинчиларни эслаб ўтдик. Унда биз биринчи даврадан сўнг жамоасини ўзгартириб, бугун эса ўша жамоасига қарши ўйнаши мумкин бўлган ўйинчиларни назарда тутдик. Масалага кенг қамровда ёндошадиган бўлсак, бу борада кўплаб футболчиларни номларини кўрсатиш мумкин.


Исломбек Рустамбеков