Игорь Шквирин: "Жамоа олдига ОЧЛга йўлланма олиш вазифаси қўйилган"

"Ғалаба қозондик ва бу жуда яхши. Бу учрашувга жиддий тайёргарлик кўргандик. Натижа ҳақли бўлди. Майдонда бугун рақибдан кўра яхшироқ кўриндик. "Насаф"нинг ўйинини жуда яхши ўргангандик. Ўйин давомида бир қатор гол уриш учун вазиятлар яратдик. "Насаф" мамлакатимиздаги яхши шаклланган жамоа ҳисобланади. Уларда яхши захира мавжуд. Таркибдан келиб чиқиб шуни айтиш мумкинки, қаршиликлар ёмон футбол ўйнашмаяпти. Уларни икки фронтда кураш олиб бораётганликлари ўз сўзини айтаётган бўлиши мумкин. Узоқ парвозлар жамоани бироз чарчатиб қўйган бўлиши ҳам мумкин. Лекин бу футбол ва бу йўлни ўзимиз танлаганмиз. Шу боис бу борада арз қилишга ҳожат йўқ деб ўйлайман", - дея гап бошлади Игорь Шквирин.

- "Олмалиқ" исталган рақибни доғда қолдира оладиган жамоа. Лекин негадир бу жамоанинг олдига юқори мақсад ва вазифалар қўйилмай келинади. Бунинг сабаби нимада?
- Ким айтди сизга жамоа олдига юқори вазифалар қўйилмайди деб? Аввалги мавсумларни инобатга оладиган бўлсак, унда бошқа вазиятлар кузатилган. Масалан 2002 йилда жамоа умуман олий лигада иштирок этмаган. Бу шунчаки мисол. Биз кеча билан эмас, бугун билан яшаймиз. Ҳозирга келиб эса клуб раҳбарияти олдимизга аниқ вазифа қўйган. "Олмалиқ" бу мавсумда ОЧЛга йўлланма берадиган ўринларни бирини қўлга киритиши лозим. Шунга қараб таркибимизда кўплаб ўзгаришлар қилинди ва баъзи футболчиларни ўз сафимизга қўшиб олдик. Жамоамизга янги қон қўйилди десам ҳам бўлади. Асосийси ўзимиз истаган ва бизга керакли футболчиларни жамоага олдик. Умид қиламизки, бу йигитлар ишончни оқлашади. Мана Шавкат Саломов терма жамоадан таклиф олди. Шунингдек, яна тўрт футболчимиз олимпия терма жамоасига жалб қилинган. Жамоамиз янада шаклланишда давом этади. Сизларни ишонтириб айтаманки, мавсум сўнггига келиб олимпиячиларимиз сони яна кўпаяди.