“Бунёдкор” академияси бинолари таъмирланмоқда

Клубимиз директори Улуғбек Мирзаев “Бунёдкор”га қайтган илк кунлардан бошлаб, академиямизни таъмирлаш бўйича дастурий режа ишлаб чиққан эди. Академия жамоа келажаги, бу йўлда унинг моддий техник базасини яхшилаш, биноларни таъмирдан чиқариш бўйича айтилган гаплар ҳаётга кўчди. Албатта, клуб президенти Меҳриддин Раззоқович Абдуллаевнинг қўллаб-қувватлови ва жамоамиз бош ҳомийси “Ўзбекнефтгаз” акционерлик жамиятининг молиялаштириши ўлароқ, режа ҳаётга татбиқ этилди ва академия фаолиятини бошлаган дастлабки кунлардан деярли тўққиз йил ўтиб, илк бор капитал таъмирдан чиқарилмоқда.

Ишлар икки босқичда амалга оширилмоқда. Даставвал, академиянинг том қисмлари тўлиқ янгиланди. Ҳозирда эса таъмирлаш ишлари иккинчи босқичга ўтган. Навбат билан биноларнинг ички қисмлари капитал таъмирдан чиқарилади. Хусусан, шу кунларда ёпиқ бассейнда ҳам ишлар жадал суратларда олиб борилмоқда. Тез кунларда “Бунёдкор” футбол клуби академияси тўлиқ янгиланган ҳолда фаолиятини давом эттиради.