BMB Holding ва Лига футболни ривожлантириш йўлида навбатдаги қадамни ташлади

4 март куни БМБ Ҳолдинг Кузатув кенгаши раиси Бекзод Маматқулов Лига вакилларини қабул қилди. Учрашув давомида 2024 йилги режалар асосий мавзуга айланди. Шунингдек, 2023 йил давомида амалга оширилган ишлар муҳокама қилинди.

BMB Holding мамлакат футболи ва футзали ривожига катта ҳисса қўшиб келаётгани барчага маълум. У нафақат Лига, балки Ассоциация билан ҳам яқин алоқаларни йўлга қўйган. Ўтган йиллар давомида БМБ Ҳолдинг Суперлига иштирокчилари бўлган Сўғдиёна ва Локомотив футбол клублари билан ҳам ҳамкорликда фаолият олиб борганди.

“Профессионал футбол лига қандай ишлаётгани ва қайси жабҳаларда ўсишга эришаётганлигини барча кўриб турибди. БМБ Ҳолдинг бу каби лойиҳалар ривожига кўмаклашиб келади. Ишонамизки, 2024 йил мамлакат футболи яна бир қадам олдинга ташлашга эриша олади. Биз футзал бўйича тарихда илк марта жаҳон чемпионатини қабул қилишга тайёргарлик кўрмоқдамиз. Футболчиларимиз эса ўз тарихида биринчи бор мундиалда иштирок этиш учун катта йўлга чиққан. Мана шу йўлда БМБ Ҳолдинг Сиз билан эканлигини ҳис қилишингизни истаймиз”, — дея таъкидлади холдинг Кузатув кенгаши раиси Бекзод Маматқулов.

"Лига ҳамда BMB Holding ўртасидаги келишув нафақат 1 йилга узайтирилди, балки унинг молиявий шартларида ўсишга эришилди. Лига қаторасига иккинчи мавсум холдинг билан ҳамкорликда фаолият олиб борилаётгани, икки томон ўртасидаги илиқ муносабатлар ва ўзаро ишонч ортаётганини ички чемпионат ривожи йўлидаги муҳим қадамлардан бири сифатида эътироф этади. Бунинг учун БМБ Ҳолдинг ва унинг аҳил жамоасига миннатдорчилик билдирамиз, - дейилади ПФЛ хабарида.