Биродар Абдураимов: "Ўғлимни табриклайман"

Бир пиёла чой устида табдирнинг бадиий қисми давом эттирилди. Меҳмонлар сўзга чиқиб, ўзининг 50 ёшлик юбилейини нишонлаётган Азамат Абдураимовни табриклашди. Сўзга чиққанлар орасида Ўзбекистон халқ артисти Бахтиёр Ихтиёров, яна бир гуруҳ кино ва театр актёрлари, Азамат аканинг отаси Биродар Абдураимов, футболимиз афсонаси Миржалол Қосимов бошчилигидаги 12-Осиё ўйинлари ғолиблари бор эди. 

"Футболчиларимиз ўша пайтда фаолиятларининг энг гуллаган ва шу билан бирга кучга тўлган даврини ўтказишаётганди. Ҳамма чизиқларда кучли ўйинчилар жам бўлган эди. Ҳимояда Андрей Фёдоров, Фарҳод Магометов, ярим ҳимояда Миржалол Қосимов, Илҳом Шарипов, Степан Атоян, ҳужумда Игорь Шквирин, Шуҳрат Мақсудов, Азамат Абдураимов ўйнарди. Лекин жароҳат олганлар ҳам йўқ эмасди. Шунга қарамай, 14-15 футболчи шу 7та ўйинда ғалаба қозониб, якунда Осиё ўйинлари ғолиби сифатида Тошкентган қайтгандик. Биласизми, бизга Осиё ўйинларининг кутилмаган жамоаси сифатида қарашган. Футбол мутахассислари, хусусан афсонавий Валерий Лобановский жуда илиқ фикрларни билдирганди. Лекин танганинг орқа томони ҳам бор, дегандек, айрим жамоаларнинг жиддий эътирозларига ҳам дуч келганмиз. Сабаби, биз бир хил рангдаги футболка ва гетраларда қитъа ўйинларига борган эдик. Бошқа жамоалар билан футболчиларимизнинг кийими бир хил рангда бўлиб қолганда яхшигина эътироз билдиришган. Хатто рақибларимиз томонидан ОФКга шикоят хати ҳам ёзилганди. Шунга қарамай, якунда юзимиз ёруғ бўлиб, Ўзбекистонга қайтиб келгандик. Фурсатдан фойдаланиб, ўғлимни бугунги юбилейи билан табриклайман. Бир зумда 50 ёшни ҳам қаршилабди (кулади). Ҳамиша у билан фахраланиб юраверайлик", - дейди Биродар Абдураимов.