Бекзод Қодирқулов: "Мақсад бўлмаса, ҳаёт бўлмайди. Суперлигага чиқишни ният қилганмиз"

Учрашувдан сўнг меҳмонлар бош мураббийи Бекзод Қодирқулов фикрларини билдирди. 

-  Курашларга бой ўйин бўлди, бу олдиндан маълум эди. Об-ҳаво ноқулай келди, аммо буни баҳона қилиб бўлмайди. Ўзимизни хатоларимиз туфайли мағлубиятга учрадик. Бунинг учун мухлисларимиздан узр сўраймиз. “Андижон” жамоасини ғалаба билан табриклайман. Кўпроқ курашларга бой ўйин бўлди. Мазмунли, сифатли ўйин бўлмади, деб ўйлайман, - деди Қодирқулов. 

-  Жамоа олдига қўйилган асосий вазифа қандай?

-  Асосий вазифа ҳар бир ўйинда ғалаба қозониш. Хоҳ уйда, хоҳ сафарда бўлсин ютмоқчимиз. 

-  Суперлигага чиқиш мақсади қўйилганми?

-  Олий мақсад ҳар доим бор. Мақсад бўлмаса, ҳаёт ҳам бўлмайди. Суперлигага чиқишни ният қилганмиз.

-  Иккинчи бўлимда Сирож Мелиевни орқароққа олинишига асосий сабаб нима бўлди?

-  Ҳужумкор ярим ҳимоячи – Жаҳонгир Абдусаломовни майдонга туширдик. Орқага олинмади. Бизга ҳужум бўлганида орқароққа ўтиб ёрдам беришига кўрсатма бергандик. Ҳаракат қилди. 

-  Тажрибали ҳимоячи Абдуқаҳҳор Ҳожиакбаров нима учун асосий таркибда майдонга тушмаяпти?

-  Унинг жароҳати бор эди. Жамоамизга қўшилганида жароҳати бор эди. Аста-секин тикланяпти ва оптимал формага кириб боряпти. Албатта, бизга ёрдам беради. Тажрибасига шубҳамиз йўқ. 

-  Бугун майдонда “Андижон” жамоасининг ўйини сизга қандай кўринди?

-  Рақиб ҳақида бирор-бир фикр билдира олмайман. Ўз клубим ҳақида гапирадиган бўлсам, иккинчи бўлимда кўпроқ паслар орқали ҳужумда фаоллик кўрсатдик. Айнан ҳужумчиларимиз яхшироқ ўйнашни бошлашгач, имкониятлар пайдо бўлди. Худди шу нарсани биринчи таймда ҳам бажаришимиз керак эди. Кўрсатма шундай берилганди. “Андижон” ҳақида эса гапира олмайман. Чунки ўз жамоамдаги муаммолар ўзимизга етарли.