Алиризо Жаҳонбахш: "Ўзбекистон терма жамоасида барчаси яхши бўлишига умид қиламан"

Эрон терма жамоаси вингери Алиризо Жаҳонбахш кеча бўлиб ўтган Фаластин терма жамоаси (4:1)га қарши ўйиндан сўнг Championat.Asia'га интервью берди. Интервьюни бу ерда ўқишингиз мумкин, Алиризо эса бироз олдин сайтимиз раҳбари Гайрат Хасбиуллин билан гаплашди. Улар яхши таниш ва дўстона руҳда суҳбатлашишди.

А.Ж.: Салом, сизни кўришдан мамнунман. Ишларингиз қандай?

Championat.Asia: Салом, ҳаммаси яхши. Сизни Тошкендаги жаҳон чемпионати саралаш ўйинида кутгандик, аммо келмадингиз.

А.Ж.: Ҳа, жароҳатим бор эди. Ўзбекистонга қарши беллашувдан битта ўйин олдин тиззамни жароҳатлаб олдим. Бугун эса майдонга чиқдим. Эрон терма жамоасига қарши жавоб ўйинига борасизми?

Championat.Asia: Ҳа, балки борармиз.

А.Ж.: Сизни кўриб турганимдан жуда ҳам хурсандман!

Championat.Asia: Биз ҳам! Ўзбекистоннинг Осиё кубогида Эронга қарши ўйнашига умид қиламан. Балки, ярим финалларда.

А.Ж.: Турнир қандай кечишини кўрамиз. Терма жамоангиз учун илк ўйин қандай ўтди? Ўйин боришини назорат қилдингларми?

Championat.Asia: Сурия билан ўйнадик, гол уриш учун имкониятлар бўлди.

А.Ж.: Сурияга қарши ўйнаш доим қийин бўлган...

Championat.Asia: Ҳа, улар доим жарима майдончасида "автобус қўйишади". Уларни Эктор Купер бошқармоқда, бу кўп нарсадан далолат беради.

А.Ж.: Ўзбекистон терма жамоасида барчаси яхши бўлишига умид қиламан. Кейинги ўйин ким билан?

Championat.Asia: Иккинчи ўйин Ҳиндистонга қарши. Ютишга умид қиламиз. Учинчи ўйин эса Австралияга қарши...

А.Ж.: Сизларда барибир имконият бор. Ўзбекистон – яхши жамоа.

Championat.Asia: Гуруҳдан чиқамиз деб ўйлайман, аммо плей-оффда кимга тушишимиз ноаниқ. Балки умуман Японияга тушармиз.