Алиризо Жаҳонбахш: "Осиё кубоги Эрон учун доим муҳим бўлган. Бу галги мусобақадан кўп нарса кутяпмиз"

- Осиё кубоги ҳақида нималар дея оласиз? Эрон терма жамоасининг ушбу мусобақадаги мақсади қандай?

- Бу галги мусобақадан кўп нарса кутяпмиз. Осиё кубоги Эрон мамлакати учун ҳар доим энг муҳим турнирлардан бўлган. Доим энг юқори натижани кўзлаганмиз. Биздаги кучли футболчилар ва ҳозирги авлоддан келиб чиқиб, катта натижаларни мақсад қилганмиз. Мусобақа стартидан олдин турнирни яхши бошлашимиз шарт эканини билардик. Бугун ажойиб ҳаракат қилдик, деб ўйлайман. Осиё кубоги ҳали узоқ давом этади, кўп ўйинлар ҳали олдинда. Биз етарли тажриба ва сифатга эгамиз. Буёғига ўйинлар қийинлашиб кетаверади. Кўп нарсани орзу қиляпмиз. Умид қиламанки, ўйлаган натижамизга эришамиз. 

- 2019 йилги Осиё кубоги Эрон учун бироз омадсиз якунланган. Бу сафар Эрон ўша хатоларни тўғрилаб, мусобақа чемпиони бўлишига қанчалик ишонасиз?

- Ҳа, ўша мусобақада биз омадсизликка учрагандик. Ярим финалда Японияга имконият бой берилгани эсимда. Бу мусобақада ҳам аввалгидек иштиёқдамиз ва катта мақсадларни кўзлаганмиз. Биринчи ўйин ҳар доим қийин, аммо биз ўйиндан ўйинга яхшироқ ҳаракат қилишга интиламиз. Осиё кубогида узоқроққа боришга ҳаракат қиламиз. Терма жамоанинг ҳозирги авлодидан умидлар катта. Биз бу орзулар ушалишига ишонамиз.