Александр Хомяков: "Олимпик" бутун ўйин давомида биздан кучлироқ эди"

- Ўйин ҳақида 

- Ҳаммасини кўрдингиз, "Олимпик" бутун ўйин давомида биздан кучлироқ эди. Бизга маҳорат ва характер етишмади. Режалаштирган футболимизни кўрсатолмадик. Биз биринчи голни ура олдик, аммо афсуски, ўйинимиз жуда ёмон эди. "Олимпик" ҳар тарафлама биздан кучли эканлигни намойиш қилди. Улар бунга ҳақли эканликларини исботлашди, жамоага Суперлигада омад тилайман! 

- "Машъал" жамоаси Суперлигада қолиш учун қулай имкониятга эга эди. Масалан, чемпионат охирги турида "Сурхон"ни ютиши мумкин эди ёки бугун ҳам нисбатан тажрибали жамоа сифатида муваффақиятга эриша оларди, аммо жамоа негадир иккинчи рақам остида ва жуда пассив ҳаракат қилди. Бунга нима сабаб бўлди? Мураббийлар штаби футболчиларни ўйинга тайёрлай олмадими?

- Ҳозир кўп нарсани айтишим мумкин. Очиғи, биз ҳеч қачон биринчи рақамли жамоа сифатида ўйнамаганмиз. "Сурхон" билан баҳсдан кейин руҳий жиҳатдан кучсизландик. Биз у ерда ижобий натижа қайд этишни истагандик, бироқ ўхшамади. Шундан сўнг кейинги учрашувга тайёрланиш учун бизда 4 кун бор эди ва айтганимдек, руҳий тарафлама тайёр бўлиш иложсиз эди. "Олимпик" қарши ҳужумда яхши ўйнашини инобатга олиб, биринчи рақам остида ўйнаш мантиқсизлик бўларди. 

Майдон марказида жуда суст ўйнадик. Аммо ҳеч нарса ўхшамади. Рақиб бизга қараганда тажовузкорроқ ва тезкорроқ ҳаракатланди. Кўплаб яккакурашларда мағлубиятга учрадик.

- Жамоангизнинг асосий "қуроли" Годвин Чика таркибда кўринмади. Бу нима билан боғлиқ эди?

- У жароҳатда эди, ўзини ноқулай ҳис қилди. Шу боис мураббийлар штаби билан келишган ҳолда уни қайдномага киритмадик.