19 ёшли посбон, "Насаф" футболчиси, ОКМКни ютган мураббий ва Ўзбекистон МТЖ аъзоси — Суперлигада 7-турнинг энг яхшилари

Championat.asia сайти Ўзбекистон Суперлигаси 7-турининг энг яхшиларини аниқлади.

Championat.asia сайти талқинига кўра 7-турнинг энг яхши дарвозабони – Муҳаммадюсуф Собиров ("Сўғдиёна")

Жиззахнинг "Сўғдиёна" клуби 7-турни ўз майдонида "Андижон"га қарши ўтказди ва 1:0 ҳисобида ғалаба қозонди. Ўйин давомида жиззахликлар посбони Муҳаммадюсуф Собиров 7 марта жамоасини голлардан қутқариб қолди. Ёш дарвозабон мавсумнинг илк ўйинларида кутилмаган голлар ўтказиб юборганди, бироқ характер намойиш этиб ўзини қўлга олиб яна аввалги даражасига қайтаётгани бизни хурсанд қилади. Шу туфайли, Собиров 7-турнинг энг яхши посбони сифатида эътироф этилди.

Championat.asia сайти талқинига кўра 7-турнинг энг яхши мураббийи – Илёс Зейтуллаев ("Бунёдкор")

"Бунёдкор" 7-турнинг марказий ўйинида ОКМК устидан ғалаба қозонди - 1:0. ОКМК учун бу мағлубият мавсумдаги дастлабкиси бўлди. Тажрибали мураббий Миржалол Қосимовни мағлуб эта олган Илёс Зейтуллаев 7-турнинг энг яхши мураббийи деб топилди.

Championat.asia сайти талқинига кўра 7-турнинг энг яхши футболчиси – Акмал Мозговой ("Насаф")

"Насаф" бу тур ўз мухлислари қаршисида "Қизилқум"ни йирик ҳисобда таслим қилди - 4:0. Мазкур учрашув давомида майдон эгалари ярим ҳимоячиси Акмал Мозговой анча фаол ўйнади. Мозговой иккита голли узатмани амалга оширишдан ташқари 4 та хавфли вазият яратилишига сабаб бўлган "калит" пас берди. 110 та тўп узатишидан 105таси аниқ чиқди - 95 фоиз аниқлик. Шу тариқа, Акмал Мозговой 7-турнинг энг яхши футболчиси деб топилди.

Championat.asia сайти талқинига кўра 7-турнинг энг чиройли голи муаллифи – Игорь Сергеев ("Пахтакор")

Оғир жароҳатдан сўнг ўзининг энг яхши спорт формасига қайтаётган Игорь Сергеев "Шўртан"га қарши баҳс тақдирини ҳал қилган голни урди. Алижоновнинг чиройли ва ақлли тўп узатишидан кейин Сергеев тўпни тўхтатмасдан дарвозага йўллади. Техник жиҳатдан анчагина қийин ижрони амалга оширган Игорь Сергеев championat.asia сайти талқинига кўра турнинг энг чиройли гол муаллифи деб топилди.