Австралия терма жамоаси ҳақида

Ушбу баҳсдан олдин рақиб жамоа ҳақида қисқача маълумот беришга ҳаракат қилдим.

Ҳимоя
Австралия бош мураббийи Грэм Арнольд ҳимоя чизиғида ҳаракат қиладиган футболчиларни алмаштириш билан банд. Биринчи турда ўнг қанотда Жошуа Рисдон ўйнаган бўлса, кейинги иккита баҳсда Раян Грант бу жойни эгаллади. Ярим ҳимояда ўйнаётган жамоа сардори Марк Миллиган эса Трент Сейнсбери ўрнига марказий ҳимоячи ролини бажарди. Чап қанотда ҳаммаси яхши, Азиз Бехич мураббий унга шубҳа билан қарашига йўл қўймаяпти. Ҳужумларнинг катта қисми Бехич орқали амалга оширилади. Азиз чап қанотдан узатмалар бериб, жамоадошларини жарима майдончаси ичига чорлайди. Футболчилар иккинчи қаватдаги курашларнинг кўпида зафар қучишмоқда. Дарвоз томон берилган зарбаларнинг 40таси қайтарилган. Бу кўрсаткич бўйича Австралия 24та жамоа ичида иккинчи ўринни эгаллаб турибди. Қанотлар етарли даражада фаол бўлсада, ҳимоявий ҳаракатларда муаммолар бор. Австралия дарвозаси томон уюштирилган кўплаб ҳужумлар айнан қанотлар орқали амалга ошган.

(Азиз Бехич)

Ярим ҳимоя
Майдон марказида ҳам ўзгаришлар тўхтамаяпти. Биринчи баҳсда асосий таркибда бўлган Массимо Луонго Фаластин билан учрашувда захирадан майдонга тушди. Иорданиядан учралган мағлубиятдан кейин мураббий таянч зонасига "Халл Сити" футболчиси Жэксон Ирвинни қўйди. Ирвин Австралиянинг иккита учрашувида тўлиқ ҳаракат қилди. Бу футболчи рақиб ҳужумларини бартараф этиш билан бирга стандарт вазиятларда рақиб жарима майдончасида пайдо бўлмоқда. Унинг иккинчи қаватдаги устунлиги ҳужумда ҳам ёрдам беряпти. Плэймейкер Томас Рогич ва Ирвинни ҳисобга олмасак, учинчи ярим ҳимоячи ким бўлиши аниқ эмас. Ушбу чизиқ вакиллари оддийроқ ўйнашни маъқул кўришади ва кўпроқ қанотларга пас беришади. Австралияликлар паслар сони бўйича (1618та) турнирда учинчи бўлиб туришибди, бизникилар эса еттинчи (1468та пас).

(Жэксон Ирвин)


Ҳужум
Авер Мабиль, Крис Икономидис ва Жейми Макларен ҳужум учбурчагини ташкил қилади. Чапда Икономидис, ўнгда Мабиль қанот ҳимоячиларига муаммо туғдирса марказда Макларен классик форвард вазифасини бажаради. Бу трионинг энг хавфли вакили Авер Мабиль ҳисобланади. У гуруҳ босқичидаги 3та ўйинда 20та кросс амалга оширди ва 2та гол уришга муваффақ бўлди. Мабиль иккала оёқда аниқ зарба бера оладиган футболчиларнинг бири. Чап қанотда Икономидис дриблинглар амалга ошириб, рақибни қўполлик ишлатишга мажбур қилади. Статистика бўйича Австралия терма жамоаси футболчилари орасида Крис Икономидис ўз жамоаси учун энг кўп стандарт ишлаб берган экан. Ўртада ўйнайдиган Макларен иккинчи қаватдаги жангларда кучли. Австралияликларнинг 6та голидан 2таси бош билан, яна 2таси жарима майдончаси ташқарисидан урилган.

(Авер Мабиль)

Австралия терма жамоасининг тахминий таркиби
Дарвозабон: Мэтью Райан
Ҳимоячилар: Азиз Бехич, Марк Миллиган, Милош Дегенек, Раян Грант.
Ярим ҳимоячилар: Жэксон Ирвин, Массимо Луонго, Том Рогич.
Ҳужумчилар: Крис Икономидис, Авер Мабиль, Жейми Макларен.


Австралия ушбу Осиё Кубогида чемпионлик учун асосий даъвогарлардан бири ҳисобланади, аммо бу турнирда ҳаммани мағлуб этиш мумкинлигини бир неча маротаба исботлашди. Шундай экан, Ўзбекистон терма жамоаси рақибга қарши муносиб ўйин кўрсатиб, ғалаба қозонишига ва мамлакатимизга яна бир байрамни тақдим этишига умид қиламан.