ЖЧ-2014. Финалда ким ютади? Ким қандай фикрда?

Германия ҳамда Аргентина терма жамоалари ўртасида ўтказиладиган финалдан олдин айрим футболчи ва мураббийларимизнинг фикрлари билан қизиқдик.



Баҳодир Насимов "Нефтчи" (Боку) ҳужумчиси: Кўпчилик Германия ютади деб ўйлаяпти, шунингдек ўзим ҳам шу фикрдаман. Лекин, бу финал ва унда ҳар қандай натижа қайд этилиши мумкин. Ҳар иккала терма жамоанинг имкониятлари бир хил 50/50 деб ҳисоблайман.



Бобур Йўлдошев "Локомотив" ҳимоячиси: Тўғрисини айтсам, менга бугун ким ютишининг аҳамияти йўқ. Мен мухлислик қилган жамоалар кеча ўйнаб бўлди. Финалда ўзаро майдонга тушадиган терма жамоаларнинг ўйинига қизиқмайман.



Жафар Ирисметов, мураббий: Бу ўйинда Германия фаворит, лекин, бу финал. Аргентинани ҳам ўзини кучли томонлари кўп. Ўзим Аргентинага мухлислик қиламан. Аргентинада индивидуал кучли ўйинчилар кўп, немисларда эса жамоавий ўйин анча кучли. Ўйин тақдирини битта гол ҳал қилса керак. Шу голни Месси уришига умид қиламан.



Марат Кабаев, мураббий: Ўйиндан олдин тахмин қилишни ёқтирмайман. Финал ўз номи билан финал.