Зангиота ҳокими Кубоги. ХТБ ғолиб!

Ҳал қилувчи учрашувда "Назарбек" қишлоқ фуқаролар йиғини ва туман халқ таълими бошқармаси жамоалари майдонга чиқди. Қизиқарли, ҳужумкор руҳда ўтган беллашувда ХТБ 2:0 ҳисобида ғалаба нашидасини сурди. Айтиш керак, ҳар иккала гол ҳам бир-биридан чиройли тарзда дарвозадан жой олди. Биринчи голда Дилшод Юнусматов профессионалларга хос тарзда ҳаракат қилди. Футболчи жарима майдони ташқарисида бир "замах" билан ҳимоячини "йиқитиб", тезлик билан дарвозабонни олдига яқинлашдида, яна бир "замах" орқали уни ҳам майдонга "қулатди" ва осонлик билан тўпни унинг устидан дарвозага ташлаб қўйди. Очиғи, бундай голларни анчадан бери олий ва биринчи лига ўйинларида ҳам кўрмай қўйгандик. Иккинчи гол эса, 35 метрлардан урилди. Ҳасан Абдуллаевнинг зарбасини траекторияси шундай чиройли чиқдики, финални ростакамига безаб, мухлисларга қувонч бағишлади. Шу тариқа ХТБ мусобақа ғолибига айланди. Финал баҳси якунлангач, ғолиб ва совриндорларни тақдирлаш маросими бўлиб ўтди. 

ЗАНГИОТА ҲОКИМИ КУБОГИ - 2016

НАЗАРБЕК - ХТБ - 0:2 (0:1)

20 август. Келес. "З.Жалилов" ўйингоҳи. 620 томошабин.

Бош ҳакам: Саидхон Бойхўжаев.

Қанот ҳакамлари: Султонмурод Улфатов, Искандар Зоитов.

Захирадаги ҳакам: Ойбек Умаров.

Голлар: Дилшод Юнусматов, 17 - 0:1. Ҳасан Абдуллаев, 42 - 0:2.