Япониялик журналист: "Менимча, иккала жамоа ҳам Австралияга дуч келмаслик учун ўйнайди"

Ўзбекистон терма жамоаси Японияга қарши майдонга тушади. Ўйин бошланишига саноқли дақиқалар қолаётган бир пайтда япониялик ҳамкасбимиз, "Asahi TV" мухбири Йота Нагахатани суҳбатга тортдик.

- Ўйин стартига жуда оз вақт қолди. Қандай тахмин билдирасиз?
- Иккала жамоанинг асосий таркибида ўзгаришлар борлигини кўрдим. Шунга қарамай, баҳс қизиқарли кечади деб ўйлайман. Бу ўйинда гуруҳ пешқадами ким бўлиши маълум бўлади. Менимча, захира вариантидан ким яхши фойдаланса, ўша ютиб кетади. Ўйлайманки, Японияда ғалабага бўлган имконият кўпроқ. Буни япон бўлганим учун айтмаяпман, балки жамоаларнинг кучидан келиб чиқиб айтдим. Баъзи футболчилар аввалги ўйинда иштирок этишмади ва улар бугунги ўйинга тайёр. Шунчаки тахмин қиламан: бугунги баҳсда ҳар икки жамоа ҳам кейинги босқичдаги рақиб Австралиядан қочиш учун ўйнайди. Чунки Австралия жуда кучли рақиб.

- Япония терма жамоасининг бошланғич таркиби ҳақида нима дея оласиз?
- Иккита ўйиндаги ғалабадан сўнг таркибда ўзлгаришлар бўлиши кутилганди. 10 нафарга яқин футболчи алмашган. Менимча, бу ўзгариш ҳам бизнинг ғалабага бўлган имкониятимизни сусайтира олмайди. Бизда иккита кучли таркиб бор.

- Япония термаси таркибида бугун ким ўзини кўрсатиши мумкин?
- 14-рақам (Жунья Ито), 13-рақам (Йошинори Муто) ва 10-рақам (Такаши Инуи)дан кўп нарса кутяпман. Такаши Инуи жаҳон чемпионатида Бельгия дарвозасига иккита гол урганди.

- Ўзбекистон терма жамоасидан кимни ажратиб кўрсатасиз?
- Одил Аҳмедов захирада қолибди. Лекин унинг ўрнида ўйнайдиган Фозил Мусаев ҳам кучли футболчи. Уни "Жубило Ивата"даги ўйинлари орқали биламан. Менимча, бугун Япония кўп ҳужум қилади, Ўзбекистон эса асосан ҳимояда ўйнайди.

Х.Холиқов суҳбатлашди.