Виктор Кумиков: "Ҳамма ўз билганича ўйнаса, натижа ҳар доим шундай бўлади"

- Ўйин ҳақида

- Ҳаммаси режалаштирилганидек, яхши давом этаётганди. Қарши ҳужумларга туриб бера олдик, стандартларга эга бўлдик, аммо 2-голдан кейин негадир пала-партиш ўйин кўрсата бошладик. Футболни тактик тарафдан тўғри ва мураббий айтганидек ўйнаш керак. Ҳамма ўз билганича ўйнаса, натижа ҳар доим шундай бўлади. 

- Мағлубиятга асосий айбдор ким бўлди?

- Кимнидир асосий айбдор деёлмайман. Бутун жамоа ютқазди. Ҳаммамиз айбдормиз. 

- 4 та гол ўтказиб юбориш аламли. Бундай мағлубиятни ҳеч ким кутмаганди...

- Биз ҳам кутмагандик. Биринчи таймда қулай вазиятларни қўлдан бой бердик. Иккинчи голдан кейин ҳаммаси ўзгариб кетди. Руҳий томондан дош беролмадик. 

Иккита ўйинни ютиб олсак, барчаси яхши томонга ўзгаради. Тўхтаб қолмаймиз, ҳали олдинда кўп ўйинлар бор.

- "Машъал" билан меҳмондаги ўйинда ғалаба қозона оласизларми? Бунга шахсан ишонасизми?

- Бунга доимо ишонаман. Асосийси, футболчилар ўз кучларига ишонишлари. Буни устида ишлаяпмиз, аммо ҳозирча амалда ўхшамаяпти. 

- Жамоага нима етишмаяпти?

- Ўйин сифати етишмаяпти. Ҳамма курашларда ютқазяпмиз. Ҳатто 2 га 1 ҳолатда мағлуб бўляпмиз. Шу тарафдан қийин бўлмоқда.