"УзРепорт" телеканали спорт таҳририяти бош муҳаррири Парижда!

Ўзбекистон ҳудудида ушбу мусобақани намойиш этиш ҳуқуқини қўлга киритган "УзРепорт" телеканали ЕВРО-2016нинг ортда қолган барча ўйинларини намойиш этди. Эртанги финал учрашуви муносабати билан телеканал "Спорт" таҳририяти бош муҳаррири Ёқубжон Бобожонов Франция пойтахти Париж шаҳрига жўнаб кетди.

Ҳамкасбимиз эртага финалдан олдин Сен-Денидаги "Стад Де Франс" стадионидан туриб Ўзбекистон билан алоқага чиқишни режалаштирмоқда. Демак финал учрашуви бўлиб ўтадиган стадиондаги муҳитини юртдошларимиз "УзРепорт" телеканали орқали ҳис этишлари мумкин бўлади.

"Стад де Франс" стадиони

"Бугун Париж шаҳрига етиб келдик. Катта футбол байрамига тайёргарлик ажойиб тарзда давом этмоқда. Финал учрашуви бўладиган "Стад Де Франс" стадионига бориб тегишли аккредитацияни олдик. Ўйингоҳда ҳам тайёргарликлар авижда. Бутун Франция халқи миллий терма жамоадан ғалаба кутмоқда. Бундан ташқари кўчаларда Португалия терма жамоаси мухлисларини ҳам учратиш мумкин. Парижда меҳмонлар сони соат сайин кўпайиб бормоқда. Дунёнинг турли бурчакларидан келган мухлислар билан гаплашдик. Кўпчилик икала жамоанинг имкониятини тенг баҳолашмоқда.

Финалга мутахассислар орасида ҳам қизиқиш табиийки катта. Биз жойлашган меҳмонхонада италиялик дунёга машҳур мураббий Фабио Капелло ҳамда россиялик собиқ футболчи Валерий Карпин истиқомат қилмоқда. Улар тегишли телеканаллар билан шартнома тузишган ва эртанги финал вақтида ушбу телеканалларга ишлашади.

Машҳур Фабио Капелло билан

"УзРепорт" телеканали профессионал тарзда ишлашни жорий этишни ўз олдига мақсад қилиб қўйган. Шу боис катта мусобақалар финалларига ходимлар юбориш йўлга қўйилди. Европа чемпионлар лигаси финалида телеканалимиз вакили Азиз Қудратов иштирок этди. Мана энди Европа чемпионати финалига ҳам телеканал ўз вакилини юборди. Энг асосий мақсадимиз эртанги катта ўйин муҳитини воқеа жойидан туриб Ўзбекистон халқига етказиш", - дейди "УзРепорт"  телеканали "Спорт" таҳририяти бош муҳаррири Ёқубжон Бобожонов.

"Эйфель" минораси атрофида одамлар гавжум