ЖЧ-2022 саралаши. Усмон Тошев: "Мўғулистонга ғалаба учун келдик"
09 сен 2019 16:22
Янгиликлар

ЖЧ-2022 саралаши. Усмон Тошев: "Мўғулистонга ғалаба учун келдик"

Тожикистон терма жамоаси бош мураббийи Усмон Тошев ва жамоа ярим ҳимоячиси Парвизжон Умарбоев Мўғулистонга қарши бўладиган ЖЧ-2022 иккинчи саралаш босқичи учрашуви ҳақида фикр билдиришди.

Мўғулистон ва Тожикистон ўртасидаги баҳс сешанба, 10 сентябрь куни Улан-Баторда бўлиб ўтади.

Усмон Тошев, Тожикистон терма жамоаси бош мураббийи:

- Авваламбор Тожикистон халқини республиканинг Мустақиллик байрами билан табрикламоқчиман. Барча тожикистонликларга тинчилик ва фаровонлик тилайман! Мўғулистонга қарши баҳсга тўхталадиган бўлсак, унга жиддий тайёргарлик кўраяпмиз. Улан-Баторда бизни илиқ кутиб олишди, об-ҳаво жуда яхши. Муғулистон халқи ва бу мамлакатдаги футболдан хабардорман. Мўғулистон терма жамоаси ЖЧ-2022 иккинчи саралашини биз каби ғалаба билан бошлади. Рақибимизнинг Мьянмага қарши учрашувини томоша қилиб, уни таҳлил қилдик. Мўғулистон - яхши жамоа. Эртага бизни қизиқарли баҳс кутиб турибди. Улан-Баторга ғалаба учун келдик.

Парвизжон Умарбоев, Тожикистон терма жамоаси ярим ҳимоячиси:

- Мен ҳам барча тожикистонликларни Мустақиллик куни билан қутламоқчиман! Йигитларнинг кайфияти яхши. Ўйинга тайёрмиз. Мўғулистон терма жамоасини мағлуб этиб, Мустақиллик кунига совға қилмоқчимиз. Кеча рақиб ўйинини таҳлил қилдик. Мўғулистонга қарши ўйин осон бўлмайди.