Улуғбек Бакаев: "Футболда шунақа: сен урмасанг, сенга уришади"

- Бугунги ўйин билан мавсумнинг иккинчи даврасига старт берилди. Ўйин ҳақида нима дейишим мумкин, биринчи таймда гол уришимиз керак эди. Аммо қулай имкониятдан фойдалана олмадик. Рақиб эса икки бор яхши вазиятга чиқиб иккита гол урди. Футболда шунақа: сен урмасанг, сенга уришади.

- Давралар оралиғида "Бухоро" сафига янги футболчилар келиб қўшилди. Шу ҳақда фикрингиз?

- Биринчи даврадаги ўйинимизни таҳлил қилган ҳолда янги футболчиларни таклиф этдик. Ҳужумни якунлаш ва ярим ҳимояда муаммоларимиз бор эди. Шу боис ҳужумчи ва ярим ҳимоячиларни қўшиб олдик. Ўйлайманки, жамоамизга янги қўшилган футболчилар ҳали ўзларини кўрсатади. Биз ҳаммага вақт берамиз, лекин ким кучли бўлса, ўша майдонга тушади.

- Табатадзе 12та ўйинда 1та гол урган экан. Бу сизни хавотирга солмайдими?

- Гол уриш бўйича омадсизлик кўп ҳужумчиларда учраб туради ва бунга нормал қараш керак. Балки Табатазденинг ўйин томонлама фойдаси тегар. У ҳимоячиларни чалғитиб, голни бошқа урса бунга ҳам розимиз. Тўғри, ҳужумчи гол уриши керак, аммо жамоа учун ўйнаш кераклигини ҳам ёддан чиқармайлик. Шу боис мен бу футболчини жамоамизга таклиф этаётганда статистикага унча қарамадим.

- Асосий муаммо ҳужум чизиғидами?

- Муаммолар бор, лекин айтганимдек гол уришимиз керак. Машғулотларда ҳамма яхши ишлаяпти. Ҳар бир ҳужумчимиз ўзини кўрсатишга ҳаракат қиляпти.

- Футболчи пайтингизда жуда шиддат билан ўйнардингиз. Ҳозир жамоага шу нарса етишмаяпти. Бу нима билан боғлиқ?

- Менимча, бу футболчиларнинг психологияси билан боғлиқ бўлса керак. Жамоада ҳар хил футболчилар бўлади: кимдир агрессив, кимдир шовқинсиз, кимдир техникаси баланд, кимдир тез ва ҳоказо. Биз ҳар хил дунёқарашдаги футболчилардан жамоа тузишга ҳаракат қиламиз.

- Шоҳрўз Норхоновнинг кетиши ҳақида

- Норхонов жуда яхши футболчи, аммо фаолиятини бошқа ерда давом этиришга қарор қилди ва биз унинг қарорини ҳурмат қилдик. Унга омад тилаб қоламан, биз билан ишлагани учун эса раҳмат айтаман.